KUCHING: Presiden Parti Rayat Sarawak (PRS) ti mega nyadi Menteri Pemansang Tanah enggau Kaban Parlimen (MP), Kaban Kunsil Nengeri (ADUN) sereta raban parti nya bepeluang ngabang ngagai sekeda pemesai menua beserimbai enggau hari besai Hari Raya Raya Aidil Fitri.
Entara pemesai sereta kaban parti ke bisi sama ngulu pejalai nya, iya nya bini Masing, Puan Sri Datin Amar Corrine Masing, Sekretari Besai Datuk Wilfred Rata Nissom, Menteri Muda Betanam Betupi Chara Moden Datuk Mong Dagang, MP Lubok Antu Datuk William Nyalau Badak, MP Kanowit Datuk Aaron Ago Dagang, MP Sri Aman Masir Kujat, MP Hulu Rejang Wilson Ugak Kumbong, ADUN Batang Ai Malcom Mussen Lamoh, Ngemah (Alexander Vincent) enggau Balai Ringin (Snowdan Lawan).
Kelimpah ari nya, pemesai parti bukai ke sama bisi enggau nguluka pengabang nya, Sekretari ba Opis Kepala Menteri Wilson Nyabong Ijang, Majang Ranggie, Richard Wil Uban enggau Angeline Umih Tujok.
Entara pemesai ke bisi alai sida iya nurun ngabang, iya nya Tuai Menua TYT Tun Pehin Sri Abdul Taib Mahmud, Yang Dipertua Negeri di Astana Negeri, Kepala Menteri Tan Sri Datuk Amar Adenan Satem, Menteri Pengawa Berumah ti mega nyadi Menteri Pengawa Dagang Temuai Datuk Amar Abang Johari Tun Abang Openg enggau Sekretari Perintah Menua Tan Sri Datuk Amar Morshidi Abdul Ghani.