KPWKM diberi tanggungpengawa mendingka peminta waris mansa MH17

0

KUCHING: Orang ke sebilik enggau sida ke udah dituntung penusah bilun Malaysia Airlines (MAS) MH17 ke terempas di timur Ukraine dipinta madah ngagai Opis Menteri Pemansang Orang Indu, Ruang Bilik enggau Komuniti (KPWKM) bakani sida iya deka nyambut sereta ngatur bangkai ke deka datai ari Amsterdam tu ila.

Menteri KPWKM Dato Sri Rohani Abdul Karim madah, pengawa opis menteri iya diatu udah diberi tanggungpengawa mendingka peminta ari waris tauka bala sida sebilik ke bisi sida sebilik ke kena tinggang penusah parai dalam MH17 ke terempas , madah ngagai opis menteri nya pemerat ke dikedeka sida iya pasal ngaduka bangkai sida sebilik bekaul enggau bangkai nya ke deka datai ari Amsterdam enda lama agi.

“Enda lama agi reti nya nyangka deka ngambi timpuh dalam berapa minggu tu ila.

“Kami diasuh nanya semua sida sebilik bakani deka mutarka bangkai sida sebilik nya enti udah datai ditu ila.

“Sida iya diberi pilih enti bangkai sida sebilik nya deka ditumbak ba menua sida iya empu tauka bisi sekeda nya minta kami nunu bangkai nya dulu di Amsterdam lalu bai pulai tauka nyerahka pekara nya ngagai komiti,” ku Rohani ke diberi tanggung pengawa nyaga pengelantang pendiau sida sebilik.

Iya madah munyi nya ba aum media pengudah bejadika atur pengawa ‘Semarakkan Aidilfitri, Eratkan Silaturahim, Majlis Sambutan Rumah Terbuka Jalinan Kasih Aidilfitri’ ngagai raban orang ke dituju ti sama digulu Kepala Menteri Tan Sri Datuk Amar Adenan Satem enggau bini iya, Puan Sri Datuk Jamilah Anu di Dewan Majma Tuanku Abdul Halim Mu’adzam ditu, kemari.

Entara peminta naka kediatu ke dijangka deka dipejuraika enda lama agi bekait enggau peminta sida sebilik, iya nya lungun alai bangkai nya enda ibuh ditutup, pengari sida sebilik ulih nurun ke Amsterdam mai bangkai nya pulai kelimpah ari ngelala keresa sida sebilik ke bisi ditemu ba endur bilun MH17 terempas lalu ketiga, iya nya nyendika semua perengka guna mai bangkai nya pulai kitu.

“Aku mega ngarapka semua spesimen DNA udah digaga laban enti bedau, bangkai mar deka dikelala.

“Ukai semina DNA aja, tang barang peminta mutarka bangkai sida sebilik tau dipadah ngagai opis menteri kami, ngambika ulih ngenlempungka mimit penusah sida iya,” ku iya.

Naka kediatu semua DNA rayat Malaysia dalam bilun nya nyauka semua tembu lalu semina sida ke ari menua luar aja ke bisi sekeda bedau dianjung (baka sekeda rayat Malaysia ke jadi enggau orang ari menua luar ke agi minta pemendar ari laki tauka bini tauka sida sebilik bukai ari menua luar nya enti sema bangkai nya deka ditumbak di Malaysia tauka di menua alai laki tauka bini sida iya ke datai ari menua luar).

Rohani nandu baru, kediatu tim forensik Malaysia, pegawai Opis Pemansang Islam Malaysia enggau sekeda ari pengarap bukai udah angkat ke Amsterdam lalu udah belabuh gawa netapka spesimen ke diulih sida iya sebaka enggau bangkai ke ditemu ba endur bilun ke terempas.

“Baka sekeda pinta baka lungun ke enda ibuh ditutup, enti nitihka Atur Operasyen Standard (SOP) ari menua luar dibai terebai kitu, iya enda tau enda nitihka SOP, tang enti sema iya datai di Kuala Lumpur, peminta nya ila deka dipejuraika dulu nengah aum komiti,” ku iya.

Iya madah baka diri sebilik, niang Tambi Jiee, bini enggau 3 iku anak iya ke parai dalam bilun terempas nya, sida sebilik di Kuching ditu, minta bangkai sida menyanak nya ditumbak di pendam Islam di Semariang.

Taja pia, semina sida sebilik niang Meling anak Mula ke agi nganti pemutus enti niang nya deka di tumbak di Bintulu (alai bini iya) tauka di rumah panjai asal niang di Penom, Ulu Paku, Betong.

Kelimpah ari nya, Rohani madah semua ungkus logistik deka ditanggung perintah magang, berengkah ari Amsterdam-Kuala Lumpur-Kuching lalu nyentuk ngagai pendam.

Sama bisi ba aum media nya, iya nya orang ke sebilik enggau niang Tambi Jiee ke diarika menyadi tuai iya Drahman Jiee enggau kaban bukai.

Ba aum media nya, Drahman meri besai terima kasih ngagai KPWKM sereta semua rayat Malaysia laban betatika penusah sida sebilik kelimpah ari sukung rayat mayuh.

“Penusah kami tu ukai semina penusah kami sebilik aja, tang penusah menua Malaysia…Terima kasih ke bantu sereta sukung semua kita,” ku iya.