SARATOK: Presiden Parti Rakyat Sarawak (PRS) Tan Sri Datuk Amar James Masing ngelalau rayat di Saratok anang begilik nyukung Barisan Nasional (BN) enggau tuai pemesai BN ke ulih dikearapka sida iya.
Masing madah, nyadi seiku ketuai, batang pekara ke patut dikemerat iya nya beratika rayat, lalu ukai semina ngemeratka diri empu sereta kiruh enggau politik ke mayuh tuju.
Iya madah pemerat rayat enggau komuniti enda tau enda diletak ba penuduk ke pengabis atas ari pemerat diri empu.
Iya madah munyi nya lebuh bejaku ba atur pengawa ‘‘Majlis Pemimpin Bersama Rakyat ba Rumah Budin, Lubok Kerupok, Ulu Kabo, Saratok bedau lama tu tadi.
Rambau pengerami nya, Masing mega bisi meri ungkup ari Projek Mit Menua Pesisir (MRP) penyampau RM30,000 ngagai rumah panjai nya ke baru setengah udah tembu.
Sama bisi ngulu pengawa nya, bini Masing Puan Sri Corrine Masing, ex Kaban Parlimen (MP) Saratok Jelaing Mersat, Sekretari Politik ba Opis Kepala Menteri Majang Ranggie enggau Richard Wil Uban, Penghulu Latan Ambau,Eksco Besai Nembiak PRS enggau sekeda ari penyukung Parti Progresif Demokratik Sarawak (SPDP) ba sitak nya.
Sebedau nya, ba jaku Jelaing, iya madahka diri setuju enggau penemu ‘gempung runding’ tauka dikumbai (merger of minds) entara parti serakup nya. Iya madahka sida di saratok agi ngelaluka Masing awakka suah agi nemuai ngagai Saratok.