KUCHING: Anang guai kiruh malut diri enggau penyarut politik tang pendingka dulu sebana rayat ti betapi enggau penanggul nadai ai ketegal kemarau, ku Samuel Sila Mathew Unjah (gambar).
Samuel mega ti kala gawa ba Opis Menteri Industri Kebun Bedandang Besai enggau Komoditi, Putrajaya madah munyi nya rambau dirandau pemberita ba sebengkah pengerami Rumah Terbuka Hari Raya ke diatur Menteri Kereja Raya, Datuk Fadillah Yusuf ditu, apin lama ke udah.
“Anang guai ngiruh diri enggau orang charut ba penemu politik tang kemutarka dulu sebana sereta penanggul rayat di Saratok ke betapi enggau kemarau.
“Diatu maya iya, bala pemesai mandangka sida iya ulih bekerejasama, enda ngira penemu politik, buai dulu semua bida penemu politik nya lalu perundingka penanggul rayat,” ku iya.
Iya madah, enti parti politik majak kisuk sereta kiruhka penyarut parti politik sida iya, rayat mayuh ke merinsa laban nadai ai.
Nya alai, ku iya, penyarut politik kediatu patut diiyarka dulu tang patut mantu rayat enggau lengkas.
Kelimpah ari nya, iya madah ejensi perintah mega patut beratika rega ai mineral di Saratok diatu, bisi ditikika peneka ati sekeda orang dagang.
“Diatu rega ai mineral manggai urung RM15.90 sekutak enti dibanding enggau rega ngelama tu ke semina urung RM9 sekutak.
“Nya alai, aku minta kasih ari sida ke bedagang nya, anang ngambi peluang ba pemerinsa mensia mayuh ke nadai ai diatu.
“Lalu, kedua iya, minta bala ketuai parti (enda ngira ari BN tauka penyakal) patut beratika penusah rayat ke balat suntuk ai di saratok,” ku Samuel.
Bedau lama tu tadi Sapit Kepala Menteri Datuk Patinggi Tan Sri Alfred Jabu madahka bekal ai di Pelilih Menua Betong kelebih agi di Saratok betapi enggau bekal ai ke kelalu suntuk.
Ku Jabu, Pelilih menua Saratok ke balat agi betapi enggau penyuntuk ai ari Betong laban bekal ai di Lichok udah langkang, tambah mega nadai agi jalai endur ngepam ai ari palan nya laban sungai udah langkang ketegal kemarau.
Naka kediatu ku iya, ba sitak ke betapi enggau penusah nadai ai, tiap-tiap hari JKR nganjung bekutak-kutak nyengkaum ai botol mineral enggau dua tangki besai tauka 10 kali pejalai dalam sehari.
Pengawa menih remang deka digaga enda lama agi laban diatu ku Jabu, peminta ngagai Kunsil Pengelikun Menua (MKN) agi minta bilun dikena menih remang udah dianjung.
Pengawa nya dijangka deka diputarka enda lama agi, ngambika bisi ujan maya tu.
Samuel mega meri besai terima kasih ngagai pemesai menua ke berumban meri bantu ngagai rayat Saratok ke balat sebana suntuk ai.
“Au meri terima kasih ngagai Datuk Patinggi Jabu, Menteri Industri Kebun Bedandang Besai enggau Komoditi, Datuk Amar Douglas Uggah Embas sereta ADUN Bukit Saban Robert Lawson Chuat laban ke udah beguai nulung kami di Saratok,” ku iya.