KUCHING: Mensia mayuh ke diau ba genturung pendiau Taman Matang Jaya ditu betapi enggau penanggul nyirutka bau utai kamah berindik ari uras ke nadai diambi kenyau ari minggu seiti ke udah.
Seiku ari peranak genturung pendiau nya, Mohd Ibrahim Hamid madah, bau utai kamah ba mua rumah iya nya berindik ari tugung uras ke nadai diambi kenyau beberapa hari ke udah lalu pekara nya ngujungka orang bukai ke sama diau ba endur nya enda nyamai asai.
“Hari kepenudi Trieneken ngambi uras doti iya nya kena Hari Enam minggu seiti ke udah.
“Pengudah sehari nya, sida (Trieneken) nadai agi datai ngambi uras nitihka jam sida ke gawa ngelama tu lalu ngujungka uras majak betugung ba mua rumah peranak genturung nya.
“Maya jam pengerami baka ke diatu, uras endang jampat mayuh lalu Trieneken patut lebih nemu sentang pekara tu lalu suah agi datai ngambi uras,” ku iya madah ngagai Utusan Borneo, kemari.
Nangkan ke nya, iya madah penangi ati majak nambah ketegal uras ke bedau diambi nya nyau diserungkai ukoi enggau mayau.
“Taja pan uras ke dibuai nya dalam plastik ke udah ditanchang, tang iya agi ulih diserungkai ukoi enggau mayau ke bisi sesegay ba kandang genturung pendiau tu.
“Nya ngujungka bebau but sereta ngumbai lalat datai begelumu ba tugung uras,” ku iya.
Mohd Ibrahim ngarika mensia mauh ke nguan genturung pendiau Taman Matang Jaya minta Opis Kandang Menua (PBT) mutarka pekara nya enggau lengkas.
“Kami enggai meda uras ke nadai diambi nya ngenataika penanggul bukai baka mai penyakit berampit tauka utai bukai,” ku iya.