SRI AMAN: Penusah angus ke nyadi di Kampung Temudok kena tumu pagi Hari Enam tu tadi ngemegauka mensia mayuh ba genturung pendiau nya taja pan nadai orang bebadi.
Kebuah pia, laban tu penusah angus ke nadai disadang ke ngujungka sebengkah rumah papan ke dipenggi Sara anak Geroge retung.
Udah nya, rumah sepiak ke dipenggi menyadi Sara semina angus 40 peratus ketegal penusah nya.
Nangkan ke nya, nitih penerang Pemesai Pemansik Balai Bomba enggau Penyelamat Sri Aman (BBPSA) PBKII Marcus, raban sida bisi nerima kanggau sentang penusah nya kira pukul 6.44 pagi hari ke sebaka.
Enam iku kaban bomba betuaika PB Amie terus ngesah palan penusah nya lalu ngerara api.
Iya madah, rumah kayu ke angus nya nadai orang nguan laban Sara enggau anak iya tinduk ba rumah menyadi iya.
“Nadai orang diripotka bebadi lalu kebuah penusah nyadi enggau penyampau pengerugi agi benung dipansik,” ku iya madah ngagai Utusan Borneo, ditu ensana.
Nitihka penerang Marcus, raban sida bomba tembu pengawa ngerara api urung pukul 7.40 pagi hari ke sebaka.