KUCHING: Menteri Muda Pengawa Berumah ke mega Kaban Kaunsil Besai Parti Pesaka Bumiputera Bersatu (PBB) Datuk Abdul Karim Hamzah kemari, nerima penatai raban pengabang Hari Raya ari Parti Keadilan Rakyat (PKR) enggau Democratic Action Party (DAP) di rumah iya di Jalai Astana ditu.
Raban DAP diuluka Chairman DAP Sarawak ke mega MP Bandar Kuching sereta ADUN Kota Sentosa Chong Chieng Jen lalu PKR diuluka Chairman ke mega ADUN Ba’kelalan Baru Bian.
Raban ari kededua parti penyakal nya ngungkupka awak enda kurang ari sejam begulai enggau pengabang bukai ngerami Hari Raya di rumah Karim lalu nya mandangka bida runding politik enda nagang sida berami begulai.
“Nadai salah kami raban ketuai ari parti penyakal begusung ngagai ketuai ari perintah Barisan Nasional (BN) rambau pengerami Hari Raya tu.
“Kitai (PKR) bisi nerima surat kangau ari Karim lalu ba pengerami Hari Raya taun ke udah kitai bisi ngabang ngagai rumah Datuk Rohani Abdul Karim sereta ketuai BN ke bukai,”ku Mandal Chairman PKR Sarawak ke mega ADUN Batu Lintang See Chee How ke bisi datai.
Nyaut tanya pemberita senentang penunga ADUN (PKR) Krian Ali Biju ti didinga deka ngalih ngagai parti bukai bedau lama tu tadi, See madahka Ali mengkang dalam PKR lalu iya sigi enda ngalih.
“Ali diatu benung kiruh ngabang, betemu enggau rayat di Saratok enggau Bintulu lalu nya meh kebuah iya enda enggau raban PKR ngabang di Kuching.
“Iya (Ali) sigi enda ninggalka PKR,”ku See.
Ba pengerami ke sama, Chong maya nyaut tanya pemberita madah DAP bedau ngeletakka sebarang pemutus senentang perambu ningkilka diri ari Serakup Penyakal (PR) nengeri.
Ku iya, DAP Sarawak deka berundingka pekara nya enggau silik lalu begunaka timpuh sebedau netapka pemutus.
Chong dulu agi ari tu kala mansutka jaku ke alai, DAP Sarawak merambu ningkilka diri ari PR pengudah enda setuju enggau kaul parti bukai dalam serakup ti nyukung Ukum Hudud dituku.
Entara ketuai bukai dalam DAP ke bisi datai iya nya ADUN Pending Violet Yong, ADUN Batu Kawa Christina Chiew enggau ADUN Padungan Wong King Wei.
Kelimpah ari nya, pengawa ngelalu pengabang Hari Raya Adun Asajaya nya kemari bela nerima penatai Menteri Muda Pemansang Industri enggau Raban Bansa sereta ADUN Tasik Biru ke mega Sapit Presiden Parti Tenaga Rakyat Sarawak (TERAS) Datuk Peter Nansian.