KUCHING: Menteri Pengintu Pengelantang Pendiau, Pekara Indu enggau Pemansang Ruang Bilik Datuk Fatimah Abdullah nyangkal jaku sekeda orang ti madah, bisi bechiping dalam pengawa ngurus bangkai orang ti lesi dibai bilun MH17 labuh, di nengeri tu.
Ambika banding ku iya, opis menteri iya nengah Opis Pengintu Pengelantang Raban Bansa (JKM) sama ngemeratka kededua kes iya nya ruang bilik tauka waris di Kuching enggau di Bintulu.
“Tu ukai semina dikemarat ba sebengkah kes tauka di Kuching aja, tang kami lebih agi ari JKM mega udah betemu sereta nentuka waris nyengkaum di Bintulu.
“Aku deka meri jamin ngagai orang mayuh iya nya kami nadai bechiping, aku empu udah minta pegawai JKM di Bintulu bejalaika pansik ba waris ke kena penusah tu,” ku iya ba aum pengarang berita ti diatur ba opis iya ditu, kemari.
Iya madahka, penolong direktor JKM Bintulu udah betemu sereta ngenukuka bagi bantu ke diguna orang sebilik enggau Meling Mula, iya nya bini iya Simbut Kedit, 39, enggau tiga iku anak iya.
Ku iya, entara pekara ke dikemerat ke diguna waris baka penatai pemisi, belanja tauka sekula anak.
JKM sebadau tu udah betemu enggau waris Meling Mula di flat endur sida diau, taja pia agi begunka mayuh penerang laban diatu bini (Meling) agi di Putrajaya, ku Fatimah.
“Pemulai sida ila kami deka terus ngatur baru laban naka ke diatu kami semina nerima penerang ngerambang aja,” ku iya.
Fatimah madah, JKM deka bebendar mantu kededua waris nya (Bintulu enggau Kuching) nitihka langkar ke udah bisi.
“Pekara tu mega udah dipadahka Kepala Menteri iya nya kabinet nengeri deka berandau tauka berundingka pekara tu.
“Dalam hal tu ila, JKM deka ngaga ripot ti deka diputuska kabinet ngambika nentuka bagi bantu ke diguna waris,” ku iya.
Meling seiku ari 298 penumpang ti sama lesi bebadi dalam penerebai ari Amsterdam ke Kuala Kumpur lebuh labuh di Donetsk, timur Ukraine, semak enggau garis entara menua Russia.
Kelimpah ari Meling, ti sama kena penusah nya ke asal ari Kuching iya nya Tambie Jiee, 49 sereta bini iya Ariza Ghazalee, 46, enggau empat anak seduai iya nya Muhammad Afif, 19, Muhamad Afzal, 17, Marsha Azmeena, 15, enggau Muhamad Afruz, 13.