Perambuka pelin ke patut kena napi El Nino: Voon

0

KUCHING: Mandal presiden Indu Nasional Parti Keadilan Rakyat (PKR) ke mega Mandal Chairperson PKR Pampang Stampin,   Voon Shiak Ni  minta raban ke bekaul merambu pelin ke patut dikena napi penanggul El Nino.

“Baka ke  ditemu kitai, El Nino dieka nyadi nyentuk ke bulan Januari taun baru sereta disadang ngelangkangka sungai enggau palan endur nimbun ai.

“Gaya hari ke angat sereta bisi sebun asap deka mai mayuh bengkah pekara ke enda manah nyengkaum nambahka penyampau orang ke sakit sengak, batuk sereta renga enggau kemarau ti deka ngenusahka beribu iku rayat di serata nengeri tu.” pia ku iya madah ba aum enggau pemberita pagi kemari.

Ku iya, mayuh rayat merinsa betapi enggau penanggul tu sereta nadai nerima bantu ke lengkas ari raban ti  bekuasa. Ku Voon baru, sekeda bala ketuai ditu madah, patut bisi  pelin ke manah  kena napi penanggul tu lalu ukai nyalahka penyampau rayat ke majak mayuh.

Iya mega minta raban ke bekuasa nyukung peminta bala apai indai di serata nengeri tu ke minta pemampul mua ngambi disediaka ba semua sekula kena napi gaya hari ke balat endar besebun asap. Kelimpah ari nya, iya minta raban bekuasa meri penerang ke pemadu baru enggau tikas pemanah angin (IPU) ngagai mensia mayuh nengah radio ninting hari ngambika tetiap iku ulih nyendiaka diri napi gaya hari ke jai nya.

“Enti mensia mayuh diberi penerang ke silik, sida nemu maya ke patut begalauka ai, ngena pemampul mua, enda nunu sereta ngeripot sebarang pengawa nunu.

“Penerang ke disadung nya beguna amat ngagai mensia mayuh ngambika ulih nyaup mutarka penanggul tu.” pia ku Voon.

Iya mega ngelalau mensia mayuh nyaga pengerai laban gaya hari ke balat endar diatu tau ngepunka penyakit ngelekai baka malaria enggau penyakit bekaul enggau nyamuk.

Iya sekali agi minta raban bekuasa patut nyendiaka diri tumu agi napi gaya hari ke diatu sereta madah ngagai mensia mayuh laban nya ulih mantu sida nyendiaka diri napi penyakit ngelekai kelebih agi malaria.

Iya mega minta semua orang besaup napi gaya hari ke diatu sereta anang manggaika pekara nya ba JKR, Kaunsil Ai enggau sepital aja.

Penudi endar iya meri terima kasig ngagai Sapit Direktor Kaunsil Ai Kuching laban  ti suah ngemaruka penerang ba Facebook iya bekaul enggau tikas ai ba palan nimbun ai.

“Ba runding aku nya pekara ke manah laban kami ngasaika nya beguna amat ngambika kami nemu pekara ke nyadi sereta nyendiaka diri napi nya.” pia ku Voon.