Dikarang Jacqueline David //
KUCHING: Perintah Menua ngemendarka timpuh lisin kayu ulih dikena datai ngagai 60 taun ari berengkah lisin nya dikeluarka.
Kepala Menteri Tan Sri Datuk Amar Adenan Satem madah timpuh lisin nya ulih dikena nyentuk 60 taun enti pemegai lisin nya deka nyengkaum pemerat ngulihka setipikit kandang tiga taun ari hari terubah iya dikemendarka.
“Aku nemu sida ke gawa dalam industri kayu tu irau ati, nya alai timpuh ngagai 60 taun baka ke udah dipadah aku berat ba sida iya, tang enti enda ulih nitihka atur nya, deka ngujungka lisin nya dikinsil,” ku iya lalu nambah Gerempung Kayu Sarawak (STA) bisi udah mantaika pengirau ati sida iya ba penanggul ke ditapi industri kayu di Sarawak.
Iya madah munyi nya lebuh bejadika Seminar ‘Forest Management Certification (Natural Forest)’ ti di atur Opis Kampung di Hotel Four Points By Sheraton ditu, kemari.
Iya madah Perintah Menua ulih mantu industri kayu di Sarawak ngulihka setipikit kampung.
“Perintah Menua ulih meri nengah pengulih kapasiti dalam pekara ngulih setipikit, sukung, atur sereta setindit ke patut lalu meri penetap ba tikas dagang antarabansa enggau makit domestik.
“Kena beratika sitak kampung kitai di Sarawak dijaga manah nitihka setindit antarabansa sereta dikelala komuniti dunya, Opis Kampung Sarawak enda tau enda ngambi inisiatif ngangkatka setipikit ngatur pemanah kampung di menua tu,” ku iya.
Iya nandu baru, Opis Kampung deka nyadi palan pengatur sereta pemungkal dalam proses ngaga setipikit. Opis Kampung mega udah nyendiaka perambu pemerat ke patut digaga ngemansangka atur ke patut kena bejalaika pengawa ngeluarka setipikit ngatur pemanah kampung di Sarawak.
Perintah meransang semua pemegai lisin ke besai baka Shin Yang, WTK, KTS, Samling, Rimbunan Hijau, Ta Ann enggau STIDC ngulihka ‘International Forest Management Certification’ ke produk kayu sida iya, ku iya.
“Ngulihka setipikit nya tau diambi ari ‘Malaysian Timber Certification Scheme’ (MTCS) tauka ‘Forest Stewardship Council’ (FSC) tauka ‘Program for the Endorsement of Forest Certification (PEFC) Schemes’.
“Aku kala madah dalam bulan Jun 2013, maya aku agi nyadi Menteri Tugas-tugas Khas, ba sebengkah atur pengawa , Perintah Menua minta sitak ngulihka batang dalam kandang ‘The Heart of Borneo’ (HoB) ngulihka setipikit ‘Sustainable Forest Management’ (SFM) nyentuk Julai 2017.
“Nya alai, aku madah baru, semua kompeni ke besai baka ke disebut aku tadi, ngulihka setipikit ari sitak lisin sida iya manggai Julai 2017,” ku iya.
Adenan ti mega Menteri Pengintu Pengeraja Asal enggau Rampa Menua madah ke diatu, Perintah menua meransang industri kayu, lebih agi kompeni besai ke nyadi pemegai lisin ngulihka setipikit kampung.
“Perintah Menua deka mansik polisi tu barang maya, lalu jemah ila, ngembuan setipikit kampung pemerat ke enda tau enda ke semua sitak ke belisin,” ku iya.
Iya nandu baru, Perintah ngempu tanggungpengawa baka Perintah Menua ku iya, megai tanggungpengawa ke berat netapka sebarang atur ke manah nyaga kampung.
“Nya alai, Perintah nyerumba ngulihka setipikit nyaga kampung nyadi siti pemerat ngemanahka agi pengawa sereta stindit nyaga kampung di Sarawak,” ku iya.
Taja pia, iya madah pengawa nyaga kampung tu ukai semina diserah ngagai Perintah aja tang industri kayu enda tau enda meri kerejasama sida iya ngagai Perintah ngambika ulih nyeliah jaku orang luar ke madahka chara menua tu nyaga kampung kitai enda nitihka setindit.
Di Sarawak, sebedau datai ba taun 2010, bisi dua iti palan, ‘Forest Management Unit’ tauka FMU Selaan-Linau enggau Anap-Muput FMU udah bulih ‘certification activities’ nengah ‘Malaysian Standards Certification Scheme’ (MTCS).
Anap-Muput FMU ari 2012 udah ngaga MTCS ke dipansik baru lalu mujur bulih setipikit baruh ‘Malaysian, Criteria and Indicator (Natural Forest)’ 2002.
“Aku meri terima kasih ngagai Zedtee Sdn Bhd laban udah ngangkatka nama Sarawak ba kar dunya,” ku iya.
Ba seminar nya kemari, urung 310 penyereta ari 20 ejensi, 15 ari industri kayu sereta dua NGO bisi ngulu seminar nya, alai dalam seminar nya mega bisi mantaika lapan iti keretas kereja.
Sama bisi ngulu atur pengawa nya, Menteri Perambu Pemansang Kedua enggau Pengintu Pemisi sereta Rampa Menua, Datuk Amar Awang Tengah Ali Hassan, Menteri Muda ba Opis Menteri Pengintu Pemisi Datu Len Talif Salleh, Sekretari Mendam Opis Menteri Pengintu Pemisi enggau Rampa Menua Dato Sudarsono Osman enggau Direktor Opis Kampung Sapuan Ahmad.