SIBU: Bisi 51 iku ari 13 bengkah menua nyengkaum Malaysia udah nganjung nama masuk Sibu Base Jump 2014 renggat ke enam ti deka diatur kena 19 nyentuk 21 September tu ila.
Residen Sibu Sim Kok Kee madah, bala ke masuk pengawa nya datai ari Australia, New Zealand, USA, UK, Romania, France, Denmark, Canada, Germany, Russia, Kuwait enggau Norway kelimpah empat iku ari Malaysia.
“Bala mayuh ari serata menua majak ngayanka pengerindu ngulu pengawa tu ke diatur kitai di Sibu ditu alai ba taun keterubah iya nya taun 2009 suba semina 11 iku aja datai tang penyampau nya majak nambah nyentuk ke 51 iku taun tu,” pia ku iya madah maya aum media ditu, ensana.
Ku iya, penyereta ke pemadu biak ngulu pengawa tu ila iya nya Jake Fewster ke beumur 22 taun ari menua Australia lalu pemadu tuai iya nya Gareth Parry ari menua Canada.
Ari penyampau nya ku iya, bisi lima iku indu iya nya Elaina Thornhill ari USA, Katherine Noonan ari USA, Mariah Magill ari USA, Mary Barratt ari UK enggau Ria Peck ari Australia.
Iya mega madah, baka sebedau tu mega pengawa nya deka diatur ba Wisma Sanyan ke ngembuan peninggi 126 meter.
Kelimpah ari nya, Sim mega madah, pengawa tu ila deka disempulang enggau macham bengkah program beserimbai enggau Taun Nemuai Ngagai Sarawak 2014.
“Seririh kitai deka ngangkatka menua tu, serak tu kitai mega bisi meri awak ngagai bala ‘Base Jumper’ ngulu malam main asal alai pupu raban bansa nengeri tu baka Iban, Dayak, Melayu, Melanau enggau China mantaika main asal diri empu,” ku iya madahka baru.
Ku iya, beberapa bengkah pekit mega bisi diatur maya tu ila baka pekit ngelinsu anak mit, pekit belagu enggau pekit betanda.
“Ukai semina nya, kitai mega bisi ngatur pekit ‘Pop Dance’ ti tebuka ngagai semua rayat Malaysia ke nyendiaka perais mata duit RM1,000 ngagai tim ke champian,” pia ku iya.
Nambahka nya, ku Sim sida mega bisi meri awak ngagai bala mayuh menua tu nyuwa seruyuk alai ngelakuka dagang sida enggau rega semina RM800 lalu seruyuk alai bejual barang pemakai iya nya RM180 sepemanjai pengawa nya diatur.
Bala mayuh ti bisi ati deka nyiwa seruyuk tu tau betelefon ngagai lumur 017-8524100.
Bela bisi datai maya aum tu iya nya Chairman Gerempung Malaysia BASE Captain Abdul Aziz Ahmad enggau Executive Sarawak Tourism Board Rudy Anoi.