KUCHING: Seiku penyual ikan, Zulkifli Abdullah, 23, ari Kampung Gersik ke dipelaba munuh dua iku nembiak ari Universiti Newcastle, ti benung belajarka pekara perubat ditu kena 6 Ogos tu tadi, dituduh kot majistret ditu munuh.
Tuduh nya dibacha ngagai Zulkifli ari Kampung Gersik ba mua Majistret Portia Tham Ong Leng, ke netapka 19 September tu ila, kes nya deka disebut baru, kelimpah ari nganti ripot ari Opis Kimia ditu.
Lebuh dawa nya dibacha ngagai Zulkifli, ke ngena gari lokap jil oren enda bebunyi lalu nadai sebarang pinta tauka tanya ari iya empu, tang semina nganggukka pala iya tanda iya nemu reti dawa ke dibacha ngagai iya.
Zulkifli dituduh munuh Aidan Brunger, 23, enggau Neil Gareth Dalton, 22, entara pukul 4:10 pagi ngagai 4:15 pagi di Jalai Abell, besemak enggau hotel City Inn.
Iya kena dawa nengah genteran tusun ukum Seksyen 302 ‘Kanun Keseksaan’ lalu enti ditemu salah, iya deka nerima ukum gantung sampai mati.
Pesalah nya mega agi mengkang kena jil laban beratika penyalah iya nya enda ulih dijamin sereta sida empat iku ke bukai bekaul enggau kes nya dijamin dilepas nengah ikat jamin RM20,000.
DPP Mirza Mohamad ke deka bejalaika pechara nya lalu Zulkifli nadai di arika sebarang luyar tauka kaunsel.
Zulkifli, saspek kedua sereta mega nyadi saspek berat entara lima saspek kes bunuh nya, ke sama diriman bekaul enggau kes nya.
Empat saspek bukai berumur entara 22 ngagai 55 di lepas enggau jamin kot RM20,000 seiku nengah genteran tusun ukum Seksyen 118 Kot Prosedur Pengawa Salah (CPC) lalu sida iya mega dikangau nyadi saksi berat ke nyadi kes berat.
Maya datai ba luar kot urung pukul 10 pagi kemari, semua saspek disempulang polis.
Indai Zulkifli bisi dipeda ba luar kot enggau dua iku anak mit sereta seiku indu dijangka sida sebilik.
Abis ba Kot Majistret, Zulkifli udah nya dibai ngagai Kot Session laban agi bisi kes iya ke udah dikeluar waran tangkap nengah genteran tusun ukum Seksyen 412 Kod Penal laban nyimpan mutosikal ke dikena iya enggau seiku agi saspek (nadai kaul enggau kes bunuh) tang semina kes ngerumpak.
Dua iku nembiak Briton ke kena bunuh nya baru tembu praktikal ba sebuah sepital ditu, lalu malam nya, dua iku nembiak nya diperitaka ngelantangka diri ba sebuah palan pemerindang di Jalai Padungan (Travillion) lalu nangkan nya, bisi ngetu ba sebuah bistro di Jalai Abell, alai seduai iya bisi belaya enggau seraban orang ke benung ngirup dia.
Ari laya nya, dua iku nembiak Briton nya lalu mulaika diri dalam pejalai seduai ngagai endur seduai iya diau, enda memukai seduai iya digagai empat iku lelaki nya, lalu seiku ari empat iku nya ke lalu mantap dua iku nembiak Briton nya ngujungka nembiak dua iku nya parai.
Kes tu mega angat diperita mulut mensia mayuh ukai semina ditu tang berita tu dipandang ba mayuh stesen televisyen ditabur di serata dunya.
Pasal kes tu, maya dalam riman, berita saspek tu mega bisi dibungkur pemberita ari menua luar di Kot Majistret ditu.