Berindik ari kes sarak ti majak mayuh raban intelektual, MAIS patut ngiga chara mutarka penanggul nya
Dikarang Judan Bungap //
SIBU: Pengawa beruang bilik maya umur biak, sebengkah ari kebuah kes ruang bilik tebererak mayuh nyadi ba raban bansa Iban di nengeri tu.
Kaban Kunsil Nengeri (ADUN) sitak Tamin, Datuk Joseph Mauh Ikeh madah, penemu ti enda chukup sereta ulah berumbah maya umur biak tau bendar ngujungka ruang bilik pechah taja empai lama udah didirika.
“Bisi nya jadi maya umur baru manggai 16 taun.
“Umur ke kelalu biak empai nemu berunding dalam sereta pabu chara ngetanka pengelikun sereta penegap ruang bilik,” ku iya.
Enti agi kelia suba, ku iya, bini tauka laki endang dipilih apai indai tauka disidi enggau silik dulu sebedau mutus jadi enggau pangan diri.
Iya madah, kebuah pia laban nangika jadi enggau orang ti enda menuku tauka iya ke enda tau begulai enggau pangan diri ti ngujung ruang bilik tau pechah.
“Nyadi diatu mayuh nembiak kitai bansa berumban bebai pangan diri jadi tang enda ngira ulih enda lama ngetanka ruang bilik,” ku iya madah.
Iya mantaika jaku tu maya bejadi pengawa nutup Bengkel Pengurusan Perkahwinan Dan Perceraian Mengikut Adat Bahagian Sibu ba Opis Residen Sibu, lemai kilah ensana.
Bela bisi datai maya tu iya nya Residen Sibu Sim Kok Kee, Pemesai Opis Pelilih Menua Kanowit Katis Noel Nyabong enggau Sapit Residen Sibu (Pengawa Rama) Dr Zufar Yadi.
Pengawa ke diatur sehari berunggu tu digulu bala tuai raban bansa baka pemancha enggau penghulu ari pelilih Sibu, Kanowit enggau Selangau.
Tuju pengawa tu diatur iya nya deka nyidi kes sarak enggau nikah nitihka adat, berundingka chara baru ngerijister pengawa jadi enggau sarak nitihka adat enggau nambahka penemu ti chukup ba pengawa jadi melaki bini ba bala tuai raban bansa.
Kelimpah ari nya, ku Mauh, penusah sarak mega bepun ari chura pengidup maya hari diatu udah mayuh berubah.
Bala apai indai ku iya, suah agi kisuk enggau kereja laban beumba-umba ngulihka pengeraja tang enda ngira kaul enggau anak.
“Tu tau ngujungka anak sepeneka ngereja pengawa tauka begulai enggau sapa-sapa ke enda temu pendiau laban apai indai enda tentu ibuhka pengidup anak.
“Pekara tu diumba enggau pemansang teknologi alai diatu nembiak nyamai amat deka ngiga tawing nengah macham chara lebih agi ngena telefon tauka internet,” ku iya madahka baru.
Berindik ari pekara tu, ku Mauh, iya ngarap raban intelektual nyengkaum Opis Adat Istiadat ulih nyerenih sereta ngemanahka agi adat bansa Iban, bekaul enggau pengawa belaki bebini enggau sarak.
Ba pekara ti bekaul, ari taun 2011 nyentuk bulan Ogos taun tu penyampau kes sarak bansa Iban iya nya 2,694 iti kes ari12,830 ruang bilik.
Penyampau kes sarak tu mayuh agi nyadi ba pelilih Miri iya nya ari 270 ruang bilik, 252 iti kes sarak nyadi.
Ba pelilih bukai, di Betong (2,399 ruang bilik, 523 iti kes sarak), Bintulu (2,318 ruang bilik, 202 iti kessarak), Kapit (857 ruang bilik, 499 iti kes sarak), Kota Semarahan (809 ruang bilik, 92 iti kes sarak), Kuching (146 ruang bilik, 43 iti kes sarak), Limbang (180 ruang bilik, 36 iti kes sarak), Mukah (262 ruang bilik, 44 iti kes sarak), Sarikei (2009 ruang bilik, 432 iti kes sarak), Sibu (3,253 ruang bilik, 564 iti kes sarak) enggau Sri Aman (328 ruang bilik, 57 iti kes sarak).