KUCHING: Bisi 80 iku penyereta nyengkaum pemesai enggau pengatur pengawa ladang ari opis enggau ejensi di baruh Opis Menteri Bumai enggau Industri Betanam Betupi ngulu seminar Ladang Konterik enggau Program KUKUH (LKPK) renggat nengeri Sarawak 2014 ti diatur berengkah 19 nyentuk 21 Ogos tu.
Seminar nya keterubah diatur di nengeri tu sereta udah dipenyadika Menteri Muda Betanam Betupi Moden (MoA) (Pemansik enggau Dagang) Datuk Mong Dagang.
Tuju licha diatur kena meri penerang ngagai opis enggau ejensi ti bejalaika Ladang Konterik MoA ngena chara Incorporate di nengeri tu.
“Baka ti dipadah ngagai aku tu keterubah iya licha tu diatur, aku arap endar tu nyadi pelasar ke engkeman ungkup semua pemesai sereta pengatur pengawa ladang ari semua opis enggau ejensi kaban komiti ladang konterik renggat nengeri, bagi menua enggau pelilih mit menua bekunsi seraya betukar penemu.
“Kebuah pia laban kita ti ngulu licha tu deka ngentaika penerang tauka mesej ngagai pengereja pengawa ke bukai tauka ngagai orang bumai bekebum pasal polisi perintah enggau program ti bekaul enggau betanam betupi baka Program Ladang Konterik tu,” ku Mong seraya bejadika licha nya ba sebengkah hotel ditu, pagi kemari.
Licha nya diatur Opis Menteri Betanam Betupi enggau Industri Asas Tani begulai enggau Opis Betanam Betupi Nengeri (JPS), FAMA, MARDI, Lembaga Perindustrian Nenas Malaysia (LPNM), IADA Samarahan, IADA Kalaka-Saribas-Betong, Agrobank, enggau TEKUN.
Bisi 10 keretas kereja dipejuraika ba licha nya nyengkaum tuju program ladang konterik, program KUKUH, pekara bekaul enggau nyadung asil, mungkus enggau ngelekatka label asil, nyual, spefikasi makit produk bekebun bumai ti dipejuarika FAMA.
Opis betanam betupi bejuraika keretas kereja pasal bekunsi peneleba enggau pemar, isu kemaya hari tu lebuh bejalaika program ladang konterik di Sarawak dalam timpuh RMK-9 nyentuk ke diatu.
Lalu ejensi bukai baka MARDI, LPNM, Agrobank enggau TEKUN sama bela bejurai sebengkah keretas kereja nyengkaum teknologi betenam betupi, pelin LPNM enggau tuju sereta servis enggau duit injau.
Bela bisi ngulu atur pengawa nya kemari Sekretari Mendam Opis Menteri Betanam Betupi Moden Datu Dr. Ngenang Jangu sereta sapit direktor FAMA Nengeri Sarawak Suudi Arof.