Nanta nyuaka RM137,000 penyampau geran perintah ungkup 17 buah NGO

0

KAPIT: Sapit Menteri Pemansang Menua Pesisir enggau Kandang Menua Alexander Nanta udah nyuaka geran RM 137,000 ari perintah ngagai 17 buah gerempung ukai dikuasa perintah (NGO) empai lama ke udah.

Pengawa nyauka geran nya udah diatur ba Meligai Hotel seraya dikemataka bala ketuai opis enggau ketuai raban bansa nyengkaum Sapit Residen Kapit, Zul Usop.

Lebuh ke bejaku, Alexander ngelalau bala penerima geran ngena nya enggau manah sereta merambu atur pengawa ti yau mai penguntung ngagai kaban gerempung sida.

“Aku bisi nerima peminta kita ti minta diungkupka belanja. Penyampau nya engka enda nitihka peminta kita tang bi si dikena nambahka penyampau belanja  ke dikemisi kita. Nya alai kena meh belanja tu memanah ngambi pulaika penguntung ngagai kaban gerempung kita”, pia ku iya.

Ku Alexander, dalam kandang beberapa minggu ke sebedau tu iya udah nemuai ngagai sekeda endur dalam sitak parlimen Kapit, ke alai seraya ngabas sitak nya iya lalu nyuaka geran sereta mendingka penemu ari nembiak redak ari sitak Pelagus enggau Katibas.

Sama bisi ampit nerima geran nya baka Komiti Temuai Sepital Kapit RM 15,000, JKKK Rumah Panjai Ulu Sungai Entangai RM 10,000, Gerempung Indu Methodis Iban RM 5000, Kelab Muzik enggau Main Asal Kapit RM 10,000, Baleh-Kapit Raft safari RM 10,000, Koperasi Putai Baleh Kapit Berhad RM RM 5,000, Kelab Lumba enggau Main sereta Rama MDK RM 10,000, Serakup Tenis Bagi Menua Ke- 7 RM 4,000, Serakup Ex- Soldadu Malaysia Kapit RM RM 5,000, Raban Soldadu Wataniah Kapit RM RM 5,000, Serakup Kwang Tung Kapit RM 5,000, JKKK Palan Meri Servis Ngagai Orang Tuai RM 8,000, Serakup Ketuai Bansa Iban Pelilih Mit Kapit RM10,000, Serakup Lumba enggau Main sereta Adat Asal Opis Pelajar Kapit RM 5,000, Kelab Lumba enggau Main sereta Rekerasi Dewan Suarah Kapit RM 5,000, JKKK Jiran Kawasan Timur RM 5.000 enggau PIBG Nanga Pelagus RM 5,000.