SIBU: Peranak rumah panjai dipinta ngembuan penyiru maya nerima penatai temuai ari menua luar niki rumah panjai ngena adat enggau main asal.
Sekretari Politik Kepala Menteri Andrew Shilling madah, kelimpah ari mantaika basa ulah tu tau bendar matak pengerindu temuai datai baru.
“Kitai ukai semina ngasuh sida niki aja tang patut disambut ngena adat baka miring, dipandangka enggau main asal baka ngajat, bekuntau, bepantun tauka main bukai.
“Tu ngambika sida tau teperindang lalu enda leju datai nemuai baru dudi hari ila,” pia ku iya madah.
Iya mantaika jaku nya maya bejadika malam kelima Panggau Pengerami Mantaika Main Asal Dayak Borneo (BDCF) 2014, lemai kemari.
Bela bisi datai maya tu iya nya Sekretari Politik Kepala Menteri iya nya Jefferson Jamit, Romeo Christopher Tegong enggau Tengku Geruna, Pemanca Stanley Geramong, chairman pengatur BDCF Kaunsilor Sempurai Petrus Ngelai enggau bala ke bukai.
Kelimpah ari nya, Shilling mega ngelalau rebak baru bansa Iban anang kakang belajarka adat enggau main asal bansa diri empu ngambika semampai ulih ditampung ngagai serak seiti ke serak seiti.
“Semua kitai Dayak lebih agi bansa Iban patut bebendar ngetanka adat enggau main asal diri ngambika ke enda ditinggal identiti bansa diri,” ku iya madahka baru.
Maya tu mega iya madahka rayat ba nengeri Sarawak endang udah lama ngena konsep 1Malaysia.
Pekara tu ku iya, ulih dipeda ari penyerakup pupu raban bansa ba nengeri tu ari dulu suba.
“Diatu semua kitai enda ngira bansa enggau jalai pengarap meseti ngetanka penyerakup tu ngambika semampai ulih diau begulai enggau pangan diri.
“Ketegal tu mega kitai meseti beterima kasih lalu ngenang pemerani enggau budi bujang berani dulu suba ti berambunka nyawa ngetanka pengelikun baka ke diasai kitai nyentuk ke sehari tu,” pia ku iya madah.
Berebak enggau tu, Shilling madahka pengawa ngatur pengerami baka BDCF ukai muntang digaga laban kelimpah ari ngena puku ti besai pengerami tu mujur bepun ari kerejasama ari komiti.
“Nya alai, semua kitai beterima kasih ngagai komiti pengatur enggau Opis Kunsil Menua Sibu (SMC) ti mujur bejadika pengerami tu,” ku iya madahka baru.