Perintah nengeri setuju nerima sepuluh peratus ungkup ba MLNG4: Adenan

0

KUCHING: Perintah nengeri setuju nerima 10 peratus ari Petronas ungkup Gas Asli Cecair Malaysia Sdn Bhd (MLNG) 4 kelimpah ari ti terus berunding lebih agi bekaul enggau ngenikika royalti minyak.

Kepala menteri Tan Sri Datuk Amar Adenan Satem madah, nya nunjukka penyulut pemadu baru asil runding perintah nengeri enggau Petronas dikena nambahka penyereta dalam industri minyak enggau gis sereta minta ngenikika royalti minyak ari 5 ngagai 20 peratus.

“Petronas dulu ari nya meri 5 peratus ba MLNG 4 tang diatu sida setuju ngenikika ngagai 10 peratus.

“Tu meh penyulut ke diulih kitai lalu kami deka terus berunding sereta aku deka meri penerang ke baru pasal pekara tu,” ku iya bejaku ngagai pengarang berita ditu, ensanus.

Iya mansutka pekara nya dalam aum pengarang berita nyerumba ‘Majlis Perjumpaan Aidilfitri PBB’ ti diatur ba sebengkah hotel ditu.

Sama datai ba pengerami nya kemari, Menteri Pengawa Berumah Datuk Amar Abang Johari Tun Openg, Sapit Menteri Dalam Nengeri Datuk Wan Junaidi Tuanku Jaafar enggau Menteri Muda ba Opis Kepala Menteri (Hal Ehwal Islam) Datuk Daud Abdul Rahman.

Berindik ari pekara nya, Adenan madah, perintah nengeri enggau Petronas udah numbuhka komiti ti disereta nyengkaum raban pemesai kanan perintah nengeri enggau eksekutif kanan Petronas, dikena ngemujurka penyereta nengeri dalam industri kandang tasik dia.

“Deka bisi sebengkah komiti besai sereta lima komiti mit bekaul enggau royalti, gis, tanggungpengawa rama korporat, konterik enggau pekara bukai ti bekaul,” ku iya.

Bejaku baru iya madah, MLNG 4 deka berengkah enda lama agi tang engka ukai dalam taun tu.

Kelimpah ari nya, ku iya ‘kos pegangan’ nengeri dalam MLNG 4 mega deka dikira tang diatu nya agi diperunding.

“Tang munyi ke ditemu, udah dipesetuju kitai bisi 10 peratus,” ku iya.