Perintah Sarawak bekunsika penyinu, ku Adenan

0

Kitai deka berunding enggau silik sereta dipelaba deka meri bantu ngagai ruang bilik ti ditinggang penusah

Dikarang Jacqueline David //

KUCHING: Perintah Sarawak, bekunsi penyinu, dipelaba deka meri bantu ngagai kaban belayan tauka ruang bilik ke ditinggang penusah ditabanka bilun Malaysia Airlines MH17 labuh ditimbak ‘pro-Russian separatists’ kena 17 Julai tu tadi.

Kepala Menteri Tan Sri Datuk Amar Adenan Satem madah, perintah menua Sarawak nyangka deka meri bantu ngagai ruang bilik ke lenyau kaban belayan tauka sida sebilik ba penusah nya.

“Perintah Sarawak deka meri bantu ba awak ke semak…..kami beratika pekara tu enggau silik dulu sereta berundingka bansa tulung ke patut diberi perintah,” ku Adenan.

Iya madah munyi nya lebuh dirandau pemberita pengudah bejadika seminar ‘Forest Management Certification (Natural Forest)’ di Hotel Four Points By Sheraton ditu, kemari.

Bangkai indai enggau anak, niang Ariza Ghazalee enggau anak lelaki iya, niang Muhammad Afif Tambi, 19 deka diterebaika terus ke Kuching Hari Lima tu (pagila) pengudah atur meri basa nerima bangkai sida ke kena penusah MH17 di Kompleks Bunga Raya, Penyangkai Bilun Antarabansa KL (KLIA) di Sepang, ba hari ke sama.

Niang Ariza enggau anak iya, Muhammad Afif deka di sembiang ke dulu di Masjid Jamek Menua sebedau seduai iya ditumbak ba pendam orang Islam di Semariang.

Entara rayat Sarawak bukai ke bisi betapi enggau penusah nya, laki Ariza, niang Tambi Jiee, 49, tiga iku anak sida ke bukai, Muhamad Afzal, 19,Marsha Azmeena, 15, enggau Muhamad Afruz, 13.

Kelimpah ari nya, seiku agi rayat Sarawak, sama bisi ngena bilun nya, niang Meling Mula, 48 ari Penom, Ulu Paku, Betong.

Mensia mayuh ke deka meri basa penudi ngagai dua iku menyanak tu, tau ngagai Masjid Jamek Menua ngalih hari nya.

Ba trajedi 17 Julai tu tadi, MH17 ke benung terebai ari Amsterdam ke Kuala Lumpur ditimbak di Ukraine ngujungka semua 283 penumpang enggau 15 kelasi kapal parai.

Bilun Boeing 777-200ER lenyau nadai berita semak Hrabove ba sitak menua Donetsk Oblast, Ukraine, urung 50km ari garis entara menua Ukraine-Russia sereta labuh semak Torez, 40 km ari garis menua nya.

Bilun nya dipelaba kena timbak ‘missile’ ari sitak menua ke dipegai ‘pro-Russian separatists’.