KUCHING: Balai Dagang enggau Industri Dayak (DCCI) minta atur baru senentang permit kereja di Singapore ungkup peranak Sarawak diperundingka baru.
Pinta tu dikenatai presiden DCCI Datuk Joseph Salang Gandum ba sebengkah aum begulai enggau deligit Singapore ti betuaika menteri ba opis menteri besai Grace Fu Hari Dua tu tadi.
Salang nerang ketegal atur baru permit nya, orang gawa bansa Dayak ke beumur baruh ari 36 taun napi pemar teulihka permit.
Pemar nya ditapi ketegal sekeda penetap ti dituku ejensi di Singapore ti nagang peranak Sabah enggau Sarawak ke beumur baruh ari 36 taun gawa di republik nya pengudah sekeda kes belaya nyengkaum kes bunuh bisi ngaul bansa Dayak betaun ke udah, ku iya nerang.
“Aku ngenataika pinta ‘spisil’ ngambika permit kereja ungkup bansa Dayak ke beumur 36 taun ke baruh diperundingka baru.
“Tajapan pekara tu dibaruh kuasa perintah Singapore, penetap nya udah ngujungka peranak nengeri tu ke beumur baruh ari 36 taun ke ngembuan pengerindu gawa di republik nya napi pemar,”ku iya.
Penetap ke berengkah dituku ba taun 2012 nya udah ngujungka mayuh bansa Dayak (Sarawak) ke gawa di Singapore nadai batang pengawa agi ketegal sida enda ulih ngemanjai timpuh permit diri lalu ngujungka sida gawa di Johor.
Bepelasarka riput media, peranak Sarawak kelebih agi ke ngembuan pengelandik angkun teulihka pengawa ba industri minyak enggau gis, fabrikasyen sereta gudang.
Ba aum ke sama, sekeda isu ke bisi dikerandau iya nya senentang peluang ngerebut makit dagang di Singapore.
Salang mega madah dikena ngemujur juluk dagang nya, penerbai bilun terus ari Sibu ke Singapore ti mai produk menua tu kelimpah ari mai orang numpang patut diperunding.
Dikerandau mega, sekeda orang dagang Singapore keran deka numbuhka dagang di Sarawak lalu meri peluang ngagai raban nembiak peranak nengeri tu ngulihka peneleba nyadi manager sereta raban profesional.
Fu ke mega Menteri Rampa Menua enggau Pengeraja Asal (Ai) II sereta Menteri Luar II disempulang Konsulat Besai Singapore ke Malaysia Ong Keng Yang sereta sekeda pemesai ari opis menteri enggau ejensi ke bekaul.
Sida seraban nyempulang Fu ke benung nemuai kereja ngagai Sarawak berengkah Hari Dua nyentuk Hari Lima (sehari tu).
Isu besilih pelajar entara nembiak sekula sekondari ari Singapore enggau nengeri tu mega bisi dikerandau.
Konsulat Besai Singapore ke Malaysia ngenataika pengangkun iya ngemujurka juluk nya lalu DCCI ngenataika penyanggup meri bantu ba atur tusun pengawa kelebih agi ke ngaul sekula di menua pesisir ke tebal agi ngarika pelajar Dayak.
Disetuju, program nya ulih nyaup meri peneleba ngagai pelajar Singapore meretika Sarawak enggau peranak nengeri tu.