KUCHING: Dewan Bandaraya Kuching Utara (DBKU) deka neritka Zon Kapit Tayar ba sekeda kandang endur ke suah dedat perengka pengangkut ngelingi mengeri Kuching.
Datuk Bandar DBKU, Datuk Abang Abdul Wahap Abang Julai madah, entara kandang endur ke udah dipilih iya nya Lebuh India, Waterfront Kuching, Satok enggau jalai ba mua Palan Bebeli Barang Plaza Merdeka.
“Kandang endur ke dipilih nyadi Zon Kapit Tayar dikelala nyadi palan ke suah dedat mensia bebaikka entukar ti sengapa ngengkah entukar sebarang alai kelimpah ba endur ngengkah entukar ke disedia.
“Kitai deka meda peranak mengeri tu mereti sereta diajar ngambika enda sengapa ngengkah entukar sida ti tau ngelubah pejalai entukar bukai lebih agi ba maya orang mulai tauka mansang kereja,’ku iya.
Iya mansutka jaku tu lebuh dirandau pemberita maya demonstrasyen ‘Kapit Tayar’ ba mua Palan Bebeli Barang Plaza Merdeka ditu, kemari.
Iya nambah, chara nya dituku ketegal majak mayuh orang bebaikka entukar ngengkah entukar sida sengapa endur diatu.
Ku iya, DBKU udah disikap ngena perengka ngapit tayar nitihka bansa tayar ungkup ke ngelanggar atur nya.
“Kitai deka neritka atur, enda ngira lori tauka bansa entukar ke ditemu diengkah ba Zon Kapit Tayar, ukum ke terit deka dilempai ba orang ke ngempu entukar.
“Chara tu enda nyeliahka entukar ke diempu ejensi perintah ke mai lumur QSG. Enti ditemu ngelanggar atur, tayar entukar nya deka dikunchi mega,”ku iya.
Ngenang senentang bayar kompaun ke deka diletak enti orang ngempu entukar deka muka pengapit tayar, iya madah naka ke diatu chara nya diteritka nitihka perintah notis.
“Kitai deka meri notis keterubah ungkup penyalah keterubah lalu notis kedua enti iya nandu penyalah nya.
“Enti ditemu tiga kali ngereja penyalah, kami nadai dua tiga ngeletak bayar kompaun nitihka undang-undang opis kaunsil kandang menua (PBT) iya nya enda ngelui ari RM100,” ku iya.
Iya nambah, entukar ke udah dikunchi deka diirit ngagai endur bukai enti orang ke ngempu entukar nya enda datai dalam timpuh 4 jam.
Bela datai, Kaban Dewan DBKU Datuk Wee Hong Seng enggau Sapit Direktor DBKU Kartina Zamhari.