PAKAN: Nembiak sekula ke diau bemalam ba buding ke maya hari tu patut berasai temegah ati enggau kereban tauka penyukup perengka ke bisi disediaka perintah ngagai sida.
Chairman Opis Penyanding Penemu Sarawak 1Malaysia Datuk Joseph Salang Gandum madah, enti dibanding enggau nembiak ke diau ba buding dalam taun 1960 tauka 1970 suba, nembiak diatu jauh nyamai agi.
“Keba ba rumah panjai sida nya bisi empai datai karan.
“Nya alai, nadai kebuah sida enda ulih ngeransing diri ba pekara pelajar enti sida endang bebendar deka ngulihka pemandai,” ku iya.
Iya mantaika jaku tu maya program licha peransang nembiak SPM ba Sekula Sekondari (SMK) Pakan ditu, empai lama ke udah.
Program sehari berunggu nya sebengkah ari program ke diatur nyerumba Pesta Pakan ke mega ngembuan tuju nyaup ngangkatka tikas pelajar nembiak.
Bela bisi datai maya tu iya nya Pemesai Opis Pelilih Pakan Alexander Liau enggau Prinsipal SMK Pakan Lulong Katoi.
Kelimpah ari nya, ku Salang, bala apai indai mega enda tau semina bepanggai ba pengajar ke ngajar anak sida.
“Apai indai bela ngembuan tanggungpengawa nyaup nyungkak pemansang pelajar anak sida.
“Kitai anang semina ngandalka anak belajar ba sekula aja,” ku iya.
Nambahka nya, ku iya, Gerempung Apai Indai Enggau Pengajar (PIBG) bela bisi tanggungpengawa ba pekara pelajar nembiak.
Salang madah, raban gerempung tu tau berandau enggau bala pengajar bela berundingka chara baka ni ngembing nembiak ngambika tau bulih pemujur ba peresa.
Pia mega ku iya, bala pengajar patut ngajar pelajar sida baka ngajar anak diri empu.
Kaban Parlimen Julau nya mega ngelalau bala nembiak menua pesisir ngambika anang kelalu bekenaka telefon ninting maya.
“Anang kelalu bepegaika telefon laban nya tau ngeruga pelajar kita.
“Tang kena telefon kita enggau manah baka ngulihka penemu baru ari internet,” pia ku tandu iya.
Salang mega maya tu ngajar nembiak ke bisi datai ngambi ngemeratka pelajar teknikal laban awak ba pengawa nya majak mayuh.
Ku iya, sida ke bisi pelajar ba pengelandik teknikal diatu muntang ngiga pengawa.
Berebak enggau tu mega, iya bisi madah pengidup ba rumah panjai ulih disungkak enggau pengawa betanam lada, getah tauka sabun kelimpah betanamka sayur.
“Mayuh orang di Pakan ditu udah mujur ba pengidup nengah pengawa betanam lebih agi baka nanam lada,” ku iya madah.
Ngalihka lemai nangkan program nya, Salang dipebasa bejadika Pekit Betabuh enggau Pekit Ngajat.
Pekit nya sebagi ari pekit ke bisi diatur nyerumba Pesta Pakan.