SARATOK: Opis Menteri Pemansang Menua Pesisir enggau Kandang Menua nengah Opis Pemansang Orang Betanam Getah Kebun Mit (Risda) udah ngungkupka belanja RM7.97 miliun dikena ngemujurka Projek Agropolitan Gunung Sadok di Awik enda jauh ari ditu.
Direktor Opis Risda Menua, Wahid Marican Mohamad Daud Marican madah belanja nya diungkup kena nanam getah ke bekualiti tinggi.
Projek deka dipejalaika nengah chara berenggat, ke alai renggat keterubah ti disereta 161 iku ari Ulu Awik-Kabo enggau Rissau ke mungkur urung 349 hektar tanah, ku iya.
Naka ke diatu, bisi 101 iku udah masuk dalam projek ke dipejalaika ba Blok A, B, C ti mungkur urung 293.93 hektar tanah udah dikemendar, lalu 60 iku agi dalam blok D ke mungkur urung 52.61 hektar tanah diatu benung dalam proses, pia ku iya lebuh ke nyadi saksi pengawa nyain sempekat entara pesereta enggau Risda ke diatur ba Dewan Librari Mensia Mayuh ditu kemari.
Tuju projek nya dipejalaika dikena munaska penyeranta sereta nyungkak tikas sosio ekonomi rayat di menua pesisir, pia ku iya.
Projek nya disadang deka ngemansutka asil dalam taun 2018, pia ku iya seraya mantaika pengarap ati genap iku ke masuk ba projek nya deka bulih penatai pemisi RM2,500 ninting bulan.
Sama bela bisi ngulu pengawa nyain sempekat nya Sapit Residen Betong, Laga Kueh, Pemesai Opis Risda Betong, Hardenan Gulong enggau Menijer Ladang Risda Menua tu, Khairul Imran Mohammad,