KUCHING: Penyampau sekula ke ari baruh bungkur program Sekolah Amanah Malaysia (SAM) deka ditambah sepemanjai timpuh pelin BluePrint (BP) 2013 -2025 Opis Menteri Pelajar Malaysia (KPM).
Sapit Menteri Pelajar Datuk Mary Yap Kian Ching netapka kenyau dituku dalam taun 2011, sekula ke dipilih nyereta Sekolah Amanah Malaysia nengah embing Yayasan Amir (YA) udah mandangka asil ti chukup manah.
Ba penemuai Mary ngagai sebuah ari lima buah SAM iya nya Sekolah Kebangsaan Combined ditu kemari, iya lantang ati meda pengeran raban pelajar ke deka ngemansangka diri ba sekula nya.
“Sehari tu, juluk KPM deka ngadaka sekula ti nyendiaka chara belajar ti ‘holistik’ bisi di Sekolah Kebangsaan Combined.
“Nengah SAM, kitai ukai semina deka nentuka pelajar bulih pemutus gred ‘A’ ba peresa tang kitai deka nentuka tiap iku sida dilatih nyadi orang ke ngembuan penau ti tinggi.
“Baka ke dipeda aku ba sekula tu, raban nembiak ke ngembuan pengarap ba diri empu lalu sida enda rawan betanya, ngulihka penemu ari pengajar,’ku iya lebuh nyimpul penemuai diri ungkup kedua kali ngagai SK Combined.
Mary nambah, laban semua 10 buah sekula iya nya lima di Johor enggau lima di Sarawak udah mandangka asil ti manah kenyau ari baruh perabung SAM, KPM merambu deka ngangkat mayuh agi sekula bukai nyereta SAM dalam timpuh pelin 2013 – 2025.
“Nengah BP KPM 2013-2012 kitai nagit ulih matak enda kurang ari 500 buah sekula dalam SAM di serata menua.
“Tang, ari perati aku enggau munyika jaku sapit menteri besai bedau lama tu tadi, kitai deka meda semua sekula nitihka konsep SAM,”ku iya.
Ngenang kaul ke sama, iya mega madahka konsep ke dituku dalam SAM nya deka nyikap nembiak sekula nyadi raban ketuai ke landik jemah ila.
Ku iya, bengkah pelajar ti matih sereta nelebaka raban nembiak nyadi seiku ketuai dikemerat dalam program tu.
“Asil nya ila, kitai deka bisi raban nembiak ke ngembuan chukup kualiti ti ukai semina ngenggam diploma, degree enggau PHD.
“Tu meh asil, kitai ulih meda bengkah pelajar ‘holistik’ ulih dikemeran di SK Combined,”ku iya.
Empat sekula bukai di Sarawak ti ari baruh bungkur SAM iya nya Sekolah Menengah Sains Kuching, SK Kpg Empila Samarahan, SK Tabuan enggau SMK Bandar Kuching (2).
Bela bisi maya nya Direktor Opis Pelajar Sarawak Serina Sauni sereta orang bukai.