KUCHING: Bisi 186 iku pemesai Opis Betanam Betupi Sarawak udah nerima Anugerah Perkhidmatan Cemerlang (APC) enggau 122 iku pemesai opis nya ti pinchin ke beumur 60 taun.
Setipikit nya disuaka Sapit Kepala Menteri ti mega Menteri Betanam Betupi Moden Datuk Patinggi Tan Sri Alfred Jabu Numpang ba Majlis Anugerah Perkhidmatan Cemerlang (APC) Bagi Tahun Penilaian 2013 & Jasamu Dikenang, Opis Betanam Betupi Sarawak Taun 2014, ti diatur ba sebuah hotel ditu malam ensanus.
Nitihku Direktor Opis Betanam Betupi Sarawak Lai Kui Fong dalam jaku pengelalu iya madah, penyulut pengereja pengawa dalam taun 2013 amat ngemuas ati sereta nadai seiku pan pemesai nya diberi poin kurang ari 60 peratus.
Iya madah, dikena nentuka penerima gelar nya, Panel Pemansang Pengereja Pengawa ba opis nya endang milih sida bepelasarka beberapa pekara nyengkaum timpuh gawa, pengawa ti dikereja enggau penyulut, sukung Ketuai Seksyen/Pampang enggau Pemesai Opis Betanam Betupi Bagi Menua, rikud pemanah ulah enggau kategori pemesai.
Tuju sekeda pekara nya dikemeratka panel, ngambika nadai bechiping ba lebuh ke meri gelar, ku iya.
“Aku meri pengaga ati ngagai penerima APC lalu aku ngarapka gelar tu nyadi teladan ngagai semua ke bukai dikena ngangkatka penyulut diri.
“Ari gelar tu mega penerima APC nyadi model tauka chunto ngagai pemesai bukai dalam opis kitai ti deka ngangkatka kualiti servis opis (betanam betupi).
“Ngagai orang ke deka sereta udah pinchin, kami meri terima kasih sereta ngarapka kita mujur dalam semua pengawa ke dikereja,” ku Lai seraya madahka pengerami malam ensanus nya endang dikena ngerami penerima APC enggau pemesai ke pinchin.
Bejaku baru iya madahka penyulut penerima APC mega ngayanka penyulut opis betanam betupi ti ulih ngangkatka penegap runding sereta gawa dalam seiti tim.
Penegap nya ku iya, ulih ngangkatka penyerakup opis setipak enggau 6 pekara dalam Servis Pengereja Pengawa Perintah Nengeri.
“Enam pekara nya, baka Integriti, Lurus ati sereta Penyanyau, Professionyel, Berumban Ngereja Pengawa Sereta Sama Ngasaika Diri Enggau Ngempu, Gawa Begempung sereta Bepelasarka Pemanah Pemutus,” ku iya.
Ba pengerami nya mega Jabu enggau bala pemesai ke bukai nyengkaum Menteri Muda Betanam Betupi (Gerempung Peladang) Datuk Sylvester Entrie Muran enggau Sekretari Mendam Opis Menteri Betanam Betupi, Moden Datu Dr Ngenang Jangu lalu diberi basa melah kek Genap 90 taun Opis Betanam Betupi udah ditumbuhka.