Agi enda kitai ingatka pemidang bujang berani?

0

Kubur niang Kanang enggau Micheal Padel enda diintu manah tauka dikeibuh

MIRI: Taja pan baru urung setaun udah midang, Gerempung Veteran Sarawak Rangers (SRVA), apin lama ke udah berasai tekenyit endar ati meda kubur niang Datuk Temenggung Kanang Langkau ba pendam Bujang Berani di Jalai Budaya enda dikeibuhka.

Baka nya mega sebuah pendam be betapak enggau enggi iya ti diempu niang ASP Michael Pardel ke udah lesi bebadi maya ke besatup enggau bala penyelawai di Semporna, Sabah kena 3 March, 2013. Dulu ari nya, niang Kanang midang kena 3 Januari, 2013. Seduai sama bela dikuburka ba pendam nya nengah basa soldadu ke penuh.

Presiden SRVA, Lt Col (Rtd) Robert Rizal Abdullah madah, beserimbai enggau pengerami ngintu Hari Merdeka ti ke-57 kena Hari Minggu tu (seharitu), tu  meh maya perintah ngemerat sereta ngintu pendam nya tauka nirika batu pengingat ke seduai.

“Aku tekenyit endar ati meda gaya kubur niang Kanang enggau Micheal Padel. Udah ngelui setaun seduai dikuburka dia, tang pendam seduai lalu enda digaga enggau manah.

“Malu amat asai ati meda gaya pendam bujang berani menua tu ti enda dikeibuhka. Mudah amat kitai enda ingatka sida? Enti nitihka, patut bisi orang ulih ngemansutka belanja dikena ngaga kubur nya manah agi,” pia ku Rizal lebuh ke dikerandau The Borneo Post ensanus.

Rizal disempulang kaban Exco SRVA udah ngabas Pendam Bujang Berani nya kena 22 Ogos, 2014.

“Laban ke mangku tanggungpengawa ngepunka Ops Mai Pulai tauka Ops Ngerapuh 21 iku Iban Trackers enggau Sarawak Rangers ke lesi bebadi lebuh ti bejalaika operasyen di Malaya berengkah ari taun 1948 nyentuk ke 1960, aku ngemeratka pendam nya ti ngujungka sida dikuburka ba Kuching.

Rumput ba pendam nya udah ditebas sereta diberesi Thomas Ling enggau raban iya ti dipejalaika nengah chara beripai. Taja pia, pengawa ngintu pendam nya ninting hari patut dilempaika ba sebuah ari NGO soldadu ke bisi di Kuching, ngambika pendam nya seruran beresi belama,” pia ku iya.

Kanang maya ke pinchin mangku pangkat Pemesai Warren Satu (WO1), seiku ari sekeda bala bukai ke diberi gelar Seri Pahlawan Gagah Perkasa (SP) enggau Pingat Gagah Berani (PGB), maya iya ke mengkang idup suba.

Kanang bejalaika pengawa ba Rejimen Ranger Diraja ke-8 nyentuk ke iya pichin pengudah gawa nyadi soldadu ngelama 21 taun.

Pemerani iya dibasa sereta diaku ketegal udah berambunka nyawa ngelaban bala kominis ba Tanah Hitam, Perak kena pun taun 1980, ke alai maya iya bisi kena timbak tiga kali.

Lima iku bala kominis enggau seiku soldadu parai lalu seiku agi balat endar bakal maya ke betempuh nya. Udah nya iya lalu diasuh nyadi ketuai Unit Combat Intelligence Platoon ari Ranger Batalion ke-8 ngambika nyidi sereta munaska raban kominis dalam bulan Februari taun1980.

Laban ti udah mandangka pemerani maya beperang, iya diberi gelar Seri Pahlawan Gagah Perkasa (SP) enggau Pingat Gagah Berani (PGB) ari Yang di-Pertuan Agong Sultan Ahmad Shah kena 3 Jun taun 1981.

Berebak enggau nya, niang Michael seiku ari enam iku polis ti parai ketegal kena serang nyenyit bala penyelawai lebuh ti bejalaika pengawa nyaga pengelikun di Genturung Pendiau Seri Jaya, Sabah.

Beserimbai enggau nya, Robert Rizal ke sebedau tu dikelala enggau nama Robert Madang Langi, seiku bujang berani bansa Iban ke mega Chairman Komiti Ops Mai Pulai, mega udah nerima gelar Panglima Gagah Berani (PGB), gelar bujang berani ti kedua pemadu tinggi di Malaysia laban ke udah berambunka nyawa ngelaban bala kominis dalam taun 1973 di Sarawak.