SARIKEI: Rayat di menua tu patut negapka penyayau ngagai menua laban nengah penemu ke bansa nya pemesai reti merdeka enda mudah tusur ngapa.
Pemesai Opis Penyerakup Menua enggau Intergrasyen Nasional (JPNIN) Sarikei, Ahmad Noorkamal Abdul Malek madah, pengawa ngaduka menua merdeka 51 taun ke udah dikereja semua rayat Malaysia maya nya laban sida nemu pemesai reti penyamai nyadi seiti bansa.
“Buah merdeka ke disepi menua sehari tu endang patut dipebasaka semua orang enda ngira ari penemu politik, jalai pengarap enggau bansa.
“Menua ke merdeka endang nyadi chuan pendiau ke dikembuan semua kitai lalu kitai deka meda semua orang besaup enggau pangan diri maya bisi penusah enda bekira bansa enggau jalai pengarap,” ku iya.
Ahmad madah munyi nya rambai pengerami ‘Serumpun Raya Tabika Perpaduan Kampung Baru Sarikei’ ditu, empai lama ke udah.
Pengerami nya diatur ba tanah laman Kelas Tabika Pusat Aktiviti JPNIN Sarikei sereta digulu urung 80 iku orang nyengkaum bala nembiak tabika enggau bala apai indai nembiak.
Nangkan ke nya, Ahmad madah nengah program ke bansa rayat di menua tu deka ngingatka baru pemesai reti Hari Merdeka.
“Mayuh bala kitai ke bisi ditu udah nadai ingatka agi pemesai reti Hari Merdeka, tang kebendar iya kitai ke nyadi peranak Malaysia patut meri terima kasih ketegal penyamai ke udah disepi diatu.
“Nya alai, lebuh kitai beratika sekeda utai ke nyadi ba menua bukai diatu…agi mayuh orang mengkang beperang enggau pangan diri laban sida bedau ngasaika reti Hari Merdeka.
“Kitai ke nyadi peranak menua tu patut meri terima kasih laban utai ke disepi diatu, jaga manah pengelantang ke bisi diatu nyentuk ke jemah ila,” ku iya.
Nyerumba program sehari nya mayuh bengkah aktiviti bisi diatur baka nyuaka duit raya enggau nyadung menira Jalur Gemilang ngagai mensia mayuh ba kandang menua nya.