Dikarang Rengenyan Labang //
Sida ngembuan pengelebih ngelala utai tumbuh dalam kampung nyengkaum bansa buluhKUCHING: Perintah Sarawak merambu deka ngemansangka industri buluh ti mungkur raban bansa Penan nengeri tu, ke lalu deka dikelaku tauka dijual ngagai menua Jepun.
Menteri Dagang Temuai Datuk Amar Abang Johari Tun Openg madah, iya arap endar ati industri buluh nya ulih dikemaju sereta bisi peminta tinggi ari menua tasik ke lebih agi menua Jepun ti endang balat begunaka buluh baka dikena ngaga chopstik.
Nitihku iya, sekeda kandang endur ti diuan raban bansa Penan di nengeri tu udah ditemu ulih alai ngemansangka pengawa nanam buluh.
“Perintah nengeri bisi perambu deka ngemansangka industri buluh ba kandang menua ke diuan raban bansa Penan ti ditemu manah endur nanam buluh baka di Long Banga enggau Long Kevok di Baram.
“Taja pia, kami meransang raban bansa bukai sama ngemansangka industri buluh baka raban bansa di kandang menua Kota Samarahan, Lundu, Kuching enggau ke bukai.
“Opis Menteri Dagang Temuai deka nguji ngelakuka industri buluh tu laban kami ngasaika bisi meri penguntung sereta ulih dikelakuka tauka dijual ngagai markit dunya ke lebih ngagai menua Jepun ke nyengkaum restoren Jepun ti dibuka ba menua bukai,” ku iya.
Abang Johari mansutka pekara tu dalam aum pengarang berita program Ngelakuka Asil Pengelandik Jari Malaysia 2014, ti diatur Opis Pemansang Asil Pengelandik Jari Malaysia Pampang Sarawak di Tebing Ai Kuching ditu, pagi kemari.
Bepelasarka industri pemakai ku iya, urung 60 peratus restoren Jepun deka dibuka di serata dunya jemah ila, lalu nya ngayanka peminta ba produk chopstik digaga ari buluh majak nambah.
Bejaku baru, iya madahka diri arap endar ati industri buluh ulih dikemansangka di nengeri tu berindik ari ngembuan gaya rampa menua ti manah amat endur buluh tumbuh.
Pengelandik enggau peneleba raban bansa Penan ke ngelala utai tumbuh dalam kampung, nyengkaum ngelala bagi bansa buluh mega nyadika pengelebih industri buluh diberi ngagai raban bansa nya.
“Raban bansa Penan nemu bansa buluh ari nya kitai meransang sida nanam buluh, udah nya kitai ngajar sida pasal industri ti nampung nya baka produk buluh,” pia ku iya ke mega Menteri Pemansang Pengawa Berumah.
Bela bisi ngulu aum pengarang berita nya kemari, Sapit Sekretari Mendam Nengeri Sarawak Datu Ose Murang, Pemangku Residen Bagi Menua Kuching Zamahari Saidi, Direktor Opis Pemansang Asil Pengelandik Jari Malaysia Pampang Sarawak, Azran Arip enggau bala bukai.