KUCHING: DAP patut bisi di Sarawak enti dibandingka enggau UMNO laban parti nya nerima sukung ke manah ari bemacham pupu bansa di nengeri tu, pia ku chairman Chong Chieng Jen.
Seraya ngasai perambu enda ngemendarka DAP ngentapka diri di Sarawak nya enda masuk akal, iya madahka UMNO enda diterima di nengeri tu nya alai nadai kebuah parti nya patut dikerembai kitu.
“DAP ngemeranka polisi bemacham pupu bansa nya kebuah DAP diterima peranak Sarawak tang UMNO enda,” ku iya ba aum pengarang berita ditu ensanus.
Iya mansutka jaku tu lebuh ke ngenang penerang ari Kepala Menteri Tan Sri Datuk Amar Adenan Satem ti dulu agi ari tu setuju enggau perambu Chong nagang UMNO tang ngemendarka DAP tama ke Sarawak.
PAS enggau PKR bela ditagang laban parti nya asal ari Semenanjung Malaysia.
Chong ke mega Kaban Parlimen Bandar Kuching madah penerang nya ukai semina nagang raban ektrimis, tang nagang semua peranak Semenanjung Malaysia tama ke Sarawak.
Polisi perintah Sarawak sigi nagang raban ektrimis, taja pia kitai enda nagang semua peranak Semenanjung Malaysia tama ke Sarawak, tandu iya.
“Baka nya meh mega ari pekara politik, kitai nagang parti politik, organisasyen sereta NGO ke begedika bansa bukai baka Ibrahim Ali ari Perkasa enggau UMNO tama ke Sarawak,”ku iya.
Ngenang isu ke meri awak ngagai peranak nengeri tu nentuka pekara ti bekaul enggau Sarawak, Chong madahka DAP bisi kuasa autonomi nentuka pekara ke bekaul enggau Sarawak.
“Pemutus kami ukai bepanggai ba DAP Malaysia, lalu semua komiti nengeri, komiti ti netapka pemutus ba DAP Sarawak endang peranak nengeri tu empu.
“Kami ulih ngaga pemutus kediri sereta enda bepanggai ba DAP Malaysia. Nya alai nadai isu DAP Sarawak dikuasa DAP Malaysia,” ku iya.
Chong ba aum pengarang berita nya sekali agi minta Parti Pesaka Bumiputera Bersatu (PBB) besilih kerusi enggau Parti Sa’ati Rakyat Sarawak (SUPP) lalu nyatup DAP ba kandang mengeri.