Dikarang Chris Bishop //
Mabong: Raban nembiak bansa Iban diperansang belajarka pengelandik nya kena ngelai identiti diri
KUCHING: Kelas belajar ngajat renggat kedua ke diatur Indu Opis Serakup Dayak Iban Sarawak (SADIA) nengah kerejasama SADIA pampang Kuching berengkah seharitu, 1 September nyentuk pengujung bulan Oktober 2014.
Sepenyampau 13 iku lelaki enggau 12 indu udah ngerijista diri nyereta kelas lalu orang bukai ke ngembuan pengingin belajar ngajat diperansang datai terus ngagai Indu Opis SADIA di Batu 7 ditu, sehari tu.
“Ngagai orang ti ngembuan pengingin belajar ngajat, sida tau datai terus ngelawa Indu Opis SADIA maya kelas belabuh.
“Peluang mengkang dibuka ngagai semua lebih agi nembiak ti deka belajar ngajat,” ku Pengatur Kelas Ngajat Mabong Unggang ba sebengkah aum pasal ngajat renggat kedua ke diatur bedau lama tu tadi.
Iya nambah, ungkup lelaki kelas deka belabuh sehari tu berengkah jam 7:30 lemai nyentuk 9:30 lemai lalu kelas ungkup orang indu deka belabuh 3 September tu.
Mabong mega gaga pengudah meda bala ti datai enggau ati ransing deka belajar ke adat asal bansa diri empu.
“Sida madahka diri kitai bansa Iban patut ransing ngenanka main asal diri ngambika tau nentu kitai Iban jemah ila enda lenyau identiti.
“Sebengkah ari identiti kitai Iban iya nya ngajat. Nya meh kebuah kaban aku Alexander ari Taman Samarindah sanggup nganjung tiga iku anak iya ke beumur 16, 12 enggau 9 taun masuk kelas ngajat,” ku iya.
Ba renggat kedua tu, kelas ngajat orang indu deka diajar Elsie Joannes lalu sida ke lelaki deka diajar Joe Frazier Kemping.
Seduai endang orang ke tebilang ba pengawa ngajat lalu suah dikangau mandangka diri ngajat ba mayuh bengkah pengerami tauka pengawa bukai, tandu Mabong.
Sebarang tanya senentang kelas ngajat tu tau dikenatai ngagai Mabong nengah lumur 012-6925562, Elsie Joannes 013-8000544 tauka Joe Frazier 016-8589364.