MIRI: Kandang menua ke diuan Orang Ulu entara kubu ke mayuh negapka Parti Demokratik Progresif Sarawak (SPDP) lalu tu pekara ke terang dipeda.
Sekretari Parti nya, Datuk Nelson Balang Rining madah kandang menua adap ke Utara Sarawak endang menua ke ungkup kerusi parti nya.
“Menua kami (Orang Ulu) endang sebengkah ari kubu negapka SPDP ari menya,” ku iya rambau pengerami ‘Malam Perpaduan SPDP’ bepalan ba Eastwood Valley Golf & Country Club ditu malam Hari Lima tu tadi.
Nya alai, iya madah kerusi lama nya patut dinan ungkup Kunsil Nengeri (DUN) maya pengawa bepilih besai nengeri ke deka datai.
Balang mega nesau bala kaban SPDP ngambika ngenataika diri maya Aum Besai Tiga Taun Sekali (TGM) ke ditaga kena tengan bulan November tu di Bintulu.
“Kami deka mantaika notis dalam genap surat kabar ngambika kita (kaban SPDP) ulih ngenataika diri bebala mayuh ngulu TGM tu ila,” ku iya.
Pekara tu ku iya dikena mandangka parti endang mengkang nerima sukung sereta agi ulih diguna ba pengawa politik di nengeri tu.
“Kitai agi tegap lalu deka terus kering ukai semina nya aja tang mega dalam Barisan Nasional,” ku Balang.
Taja parti amat kala dituntung pemyerut ngelama tu, tang nya ukai ngelai parti terus puntan.
“Aku nangkan semua kaban SPDP deka madahka kapal kitai(parti) agi bejalai taja pangku pengawa orang ke nyadi ketuai pemadu atas bisi berubah,” ku iya.