Dikarang Rengenyan Labang //
KUCHING: Perbadanan Kemajuan Kraftangan Malaysia Cawangan Sarawak nengah program Promosi Kraf Malaysia 2014, nagit asil jual penyampau RM750,000.
Menteri Dagang Temuai Datuk Amar Abang Johari Tun Openg madah, taun tu bisi 80 iku orang dagang masuk program nya ti nyengkaum ari Semenanjung Malaysia enggau Sabah kelimpah ari orang dagang Sarawak.
Program Promosi Kraf Malaysia 2014 berangkah diatur 29 Ogos tu tadi nyentuk 7 September tu ari pukul 10 pagi ngagai 10 malam di Tebing Ai Kuching ditu.
“Taun tu tagit penyampau semua barang tauka produk ti dijual nengah program Promosi Kraf Malaysia 2014 iya nya RM750,000. Taja pia, dipelabaka ulih ngelui ari tagit nya berindik ari pemayuh temuai ari menua tasik ke datai kitu sereta bepanggai ba pengelandik orang dagang ngelakuka produk sida.
“Beberapa taun ke udah, nengah program ke sebaka kitai mujur ngumpul RM1,182,954.70 ba taun 2013, RM613,794.15 (2012) enggau RM381,214 (2011).
“Orang dagang ti masuk program sekali tu nyangkaum ari Sarawak bisi 55 iku, Kelantan (12 iku), Melaka (3 iku), Selangor (4 iku), Sabah (5 iku) enggau Perlis (2 iku) ti mandang sereta nyual mayuh macham barang pengelandik jari ke digaga ari tekstil, asil kampung, asil tanah, asil logam enggau ke ke bukai,” ku iya.
Abang Johari ti mega Menteri Pengawa Berumah mansutka pekara nya dalam aum pengarang berita ba pengarami bejadika Promosi Kraf Malaysia 2014, ti diatur ba Tebing Ai Kuching ditu, pagi ensana.
Program Promosi Kraf Malaysia 2014 ngena konsep ‘mempromosi produk terus kepada pengguna’, ti meri peluang ngagai orang dagang ti dikelas nyadi pengeluar tauka pengemeran ulih meri rega kompetatif ngagai penguna.
Tuju program diatur endang dikena meri peransang sereta peluang ngagai orang dagang kraf Malaysia ba pengawa ngelaku enggau nyual produk kraf ke digaga sida empu terus ngagai mensia mayuh.
Nengah program nya mega ulih meransang temuai ari memua tasik bebelika barang pengelandik jari Malaysia nyadi tepa.
“Aku ngasaika pengawa pemandang tauka program tu amat beguna dalam juluk kitai deka ngelaluka produk pengelandik jari asal enggau ti bisi elemen main asal kitai ngagai raban bansa sekalika ari menua luar tauka menua tasik.
“Taun tu program tu mega amat senipak bendar diatur nyerumba maya Regatta Sarawak ti dipasuk ari menua tasik sereta diatur mayuh pengerami baka lumba perau naga anatarabansa.
“Reti iya lebuh sida ke datai ari menua tasik masuk pekit Regata Sarawak tu sida tentu datai ngagai Promosi Kraf Malaysia 2014 tu sereta nyerita ngagai orang bukai di menua sida pasal produk ke dikemisi di nengeri tu,” ku iya.
Kelimpah ari nya iya madah, Sarawak deka terus ngenegapka kaul ekonomi nyengkaum industri dagang temuai enggau menua Jarkata ba taun ke deka datai kelimpah ari ti udah bisi penerebai terus entara Kuching ngagai Jakarta ti dalam timpuh penerebai sejam 45 minit
Sama datai ba aum pengarang berita nya, Sapit Sekretari Mendam Nengeri Sarawak Datu Ose Murang, Pemangku Residen Bahagian Kuching Zamahari Saidi, Direktor Perbadanan Kemajuan Kraftangan Malaysia Cawangan Sarawak Azran Arip enggau ke bukai.