KUCHING: Sekretari Politik Kepala Menteri Sharifah Hasidah kemari ngepunka penumbuh Skuad Sayang N15 Muara Tuang.
Bejaku bejadi pengawa nya, iya ngarap Skuad nya ulih ngemujur tanggungpengawa ngintu pemaik enggau pengelantang rayat ba tiap genturung pendiau enda ngira maya.
Ku iya, pengawa ngintu pemaik rayat endang seruran dikemerat kitai dalam Barisan Nasional (BN) lalu Skuad Sayang N15 Muara Tuang deka ngesan tanggung pengawa ngambika enda dipeda kelalu bepolitik.
“Skuad Sayang tu sebengkah atur baru tang iya ke amat udah lama dikereja kitai dalam parti ke alai pemaik enggau pengelantang rayat dikemerat.
“Kitai enggai dikumbai orang maya pengawa bepilih nyau majak semak baru deka ngenamping, meretika penusah rayat.
“Skuad tu diarika orang ke sama dalam parti (Parti Pesaka Bumiputera) tauka BN. Begulai meh suah agi enggau rayat nengah skuad ke baru ditumbuh tu,” ku iya.
Ngenang senentang Hari Merdeka ke diintu kemari, Hasidah ke mega ADUN Samariang ngansak semua peranak nengeri ngenegapka penyerakup sereta nyukung raban ketuai ke megai perintah.
Ketegal nya, iya madah semua peranak menua tu baik ke diau di kandang mengeri tauka menua pesisir sama bela nyukung ketuai.
“Kitai sama bela ngesan tanggungpengawa tu, nengah sukung ke tegap, semua pejalai atur pengawa ke disedia deka ulih dikemujur ,” ku iya.
Nyempulang penemuai Hasidah kemari, raban ari Skuad Sayang Samariang enggau Kaunsilor Opis Pelilih Samarahan Zakiah Basah.