KUCHING: Penyukung tim main bol Sarawak ringat besai pengudah ambis pengawa main bol entara Sarawak enggau Perak malam kemari.
Malam nya pemutus main entara Sarawak enggau Perak seri 1-1 lalu berindik ari penyarut ke bisi nyadi lima iku polis bakal sereta tujuh buah kerita polis ditunu enggau dikenyai.
Penusah ke nyadi malam nya mega ngujungka pintu pagar Zon A enggau Zon B Stadium Negeri rusak ketegal ulah urung 2,000 penyukung Sarawak ngaga penyarut lalu tama padang.
Bisi mega bala penyukung nunu suar, merechun enggau nikauka utai ngagai raban penyaga pengelikun.
Nitihka penerang Sapit Ketuai Polis Pelilih (KPD) Kuching Superintendan Fauzilan, penyarut nya mujur dirara nengah bantu Polis Anti Penyarut (PORU) lalu ngujungka bala penyukung ke ngaga penyarut pulai.
Taja baka nya ku iya, urung pukul 11.30 malam penyukung Sarawak datai baru begelumu ba mua pintu tama ngagai stadium enggau palan paking ba luar stadium kelimpah ngenyaika kerita polis.
Entara entukar polis ke bisi rusak iya nya lori Hilcom, enggau dua buah kerita Kancil, Proton Waja enggau van Toyota.
“Pengudah pengawa main bol entara Sarawak enggau Perak ambis, seraban penyukung Sarawak urung 2,000 iku tama ngagai padang lalu ngujungka pagar stadium rusak,” ku iya.
Penyukung Sarawak udah nya majak ringat ke ngujungka sida tama baru nengah pintu besai stadium.
Fauzilan madah, penyarut nya ngujungka PORU Komander Unit 55 Komeni A Batalion 11 PGA, LSF 303 Balai Polis Sekama enggau LSF 301 Balai Polis Sentral tepasa nyembur 26 iti gas ngasuh mata pedis enggau 10 iti bom asap nuju bala penyukung ke ngaga penyarut pengudah sida enggai pulai.
“Setengah jam udah nya raban sida ke ngaga penyarut ngelarika diri sereta majak ringat enggau chara nunu kerita polis lalu bala polis terus ngerah ngaga tangkap,” ku iya.
Lima iku nembiak ke beumur urung 17 ngagai 20 taun ditangkap lalu lima iku polis bisi bakal lebuh ke ngaga tangkap.
Nangkan ke nya, iya madah semua saspek ke ditangkap ditan ba lokap Balai Polis Tabuan lalu sida deka diriman kelimpah deka diperesa ai kemi.
Udah nya, Sapit Presiden Gerempung Main Bol Sarawak (FAS) Datu Mohd Abu Bakar Marzuki nyaga pengesal ati meda ulah bala penyukung ke ngaga penyarut nya.
“Penerang rasmi deka dibantai pengudah komiti FAS baum,” ku iya.
Pengari GB13, Awang Khairul Adzhar madah, penyarut ke nyadi nya ngeluai ari pengasai ati ti kelalu ringat bekaul enggau penyai ulah ke udah digaga penyukung Perak.
“Penyukung Sarawak dibukut penyukung Perak kelimpah sida (Penyukung Perak) nyebut utai ke enda manah ngagai penyukung Sarawak,” ku Khairul.
Kelimpah ari nya, ku iya GB13 mega asa laban Gerempung Main Bol Malaysia (FAM) langsung nadai ngaga nama-nama pengudah penyarut nuntung penyukung Sarawak di Stadium Ipoh.