PRS andal ulih menang ba dua penuduk baru, ku Masing

0

KAPIT: Parti Rayat Sarawak (PRS) andal ulih menang ambis nadai ba dua iti penuduk ke baru, ku presiden parti Tan Sri Datuk Amar James Jemut Masing.

Iya madah, parti ngintai penuduk ke diasai ulih alai Barisan Nasional (BN) menang.

“Kami benung ngintai dua iti penuduk ke baru alai kami andal ulih menang ba penuduk nya.

“Nadai guna semina nemu bejaku mayuh tang enda ulih mujur ba penuduk,” pia ku iya madah ngagai pengarang berita udah iya bela enggau ngambi bagi ba ‘Ice Bucket Challenge’ di rumah iya ditu, kemari.

Iya mantaika jaku nya maya ngelansa penerang ke dibantai Direktor Komiti Pengawa Bepilih (SPR) Datu Takun Sunggah empai lama tu tadi ti madahka SPR deka ngatur baru penuduk Kunsil Nengeri kena bulan Disember taun tu.

Tu melabaka ambis nadai SPR deka numbuhka semilan iti penuduk DUN baru enggau beberapa iti penuduk Parlimen baka ke digaga ba taun 2001 suba alai Sarawak udah bisi semilan iti penuduk DUN baru enggau enam iti penuduk Parlimen baru. Sebedau nya Sarawak bisi 60 iti penuduk DUN enggau 25 iti penuduk parlimen.

Takun madah, pemutus nya digaga bepelasarka pemesai menua enggau penyampau rayat.

Menua ke besai baka Baram enggau Belaga ti nyauka sebaka pemesai nengeri Pahang bisi awak deka dibagi baru lalu menua bukai baka Kuching, Sibu, Bintulu enggau Miri.

Masing ti mega Kaban Kunsil Nengeri Baleh enggau Menteri Pemansang Tanah madah, parti sida udah bisi chalun ke bisi penau ngarika dua bengkah penuduk baru nya.

Bagi chalun ba penuduk Pelagus enggau Tamin, ku Masing, parti sida udah nentuka tiga iku chlun ke bisi penau ba tiap bengkah penuduk nya.

“Tang agi ke diatu, aku empai ulih madahka sapa bagi chalun nya nambahka aku deka berandau dulu enggau Kepala Menteri. Nangkan ke nya kami minta iya mantaika sapa bagi chalun nya,” pia ku iya madahka baru.

Ku iya, parti sida bekenaka penemu enggau jaku tangkan ari Kepala Menteri laban lebih agi nemu sapa chalun ke patut dipadu bediri ba dua bengkah penuduk nya.

Penuduk Pelagus dipeda ‘angat’ udah ke dipegai chalun ngatika diri George Lagong maya pengawa bepilih nengeri taun 2011 suba. Iya udah nya nyengulai Parti Pekereja Sarawak (SWP) alai iya dipadu megai pengawa mandal presiden.

Tang taja pan baka nya, kena 15 April tu tadi iya deka tama enggau TERAS, sebengkah parti ti madahka diri bebakih enggau BN.

Bagi penuduk Tamin, PRS endang deka ngerintai nama chalun baru udah Datuk Joseph Mauh Ikeh ngaga pemutus deka ngemaduka diri ari pengawa politik.

Parti tu mega mengkang ngetanka pengari bukai ba tujuh bengkah penuduk iya nya Masing empu, Liwan Lagang (Belaga), Datuk John Sikie Tayai (Kakus), Datuk Mong Dagang (Bukit Begunan), Alexander Vincent (Ngemah), Malcome Mussem (Batang Ai) enggau Snowdan Lawan (Balai Ringin).

Ba pekara bukai, Masing melabaka pengawa bepilih nengeri deka diatur ba taun 2015, enda ngira maya udah bulan September taun seiti alai kepala menteri ti mega Chairman BN Nengeri deka mutarka penanggul ke bisi nyadi bepun ari penumbuh TERAS enggau UPP.