KUCHING: Peranak tiga buah kampung di Pelilih Simunjan minta saup perintah nengeri champur jari mutarka penanggul Tanah Bansa Asal Bumiputera (NCR) sida ke kena keruga.
Tanah ke udah dikeruga tu dipenggi 93 pintu ruang bilik ari tiga buah kampung iya nya Kampung Sekendu, Kampung Sungai Lingkau enggau Kampung Melanjuk ke balat bepanggai ngagai pengawa betanam betupi ba tanah nya.
Tiga iku pengari ari tiga buah kampung tu iya nya Sanabung Sampai, Aying Adat enggau Tri Nyanau madah, tanah ke dipenggi tiga buah kampung nya ngembuan pemesai urung 5,000 hektar lalu bisi dikeruga sebengkah kompeni kelapa sawit.
“Kami tu ngarika tiga buah kampung deka ngetanka hak tanah adat kami ba Kampung Sekendu, Sungai Lingkau enggau Melanjuk ke benung dikeruga kompeni kelapa sawit,” ku sebana sida.
Tiga iku pengari rumah panjai tu mansutka sebana munyi nengah aum pengarang berita ke diatur ba Opis t Parti Keadilan Rakyat (PKR), Batu Tiga ditu, kemari.
Nitihka penerang ari Sanabung, peranak tiga buah rumah panjai ke dikeruga nya tepasa ngatur pengawa nyekat jalai kenyau 18 Ogos tu tadi nyentuk ke diatu dikena nagang kompeni nya tama ngagai tanah NCR sida.
“Kami agi ngaga sekat ba kandang tanah adat kami ke dipasuk kompeni nya.
“Kami nemu tanah nya endang tanah adat kami ke diperimba aki ini kami endur sida bumai kelia munya,” ku iya.
Iya madah, tanah ke dikeruga nya endang tanah kebun endur kami nanam mayuh utai tumbuh kena beridup baka getah, kelapa sawit, padi, rian enggau utai bukai.
“Nya alai, ba tanah tu mega bisi pendam, tembawai lama ke udah dikeruga kompeni nya,” ku tandu iya.
Kelimpah ari nya, Senabung madah kes ngeruga tanah NCR nya udah dibai ngagai kot, tang pemutus iya kompeni ke menang.
“Taja kes kami tu udah dibai ngagai kot maya 2012 lalu kami alai ba renggat Kot Tinggi maya April 2013 tang kami ngapil baru ngagai Kot Apil bekaul enggau pemutus nya.
“Kebuah kami ngaga sekat ngambika kompeni enda majak ngeruga tanah menua kami nyentuk kes tu udah tembu sereta bela dipesetuju kededua piak,” ku iya.
Nya alai, iya madah peranak ba tiga bengkah kampung nya chukup ngarapka perintah enggau orang ke bisi besangkut paut ulih champur jari mutarka penanggul tu.
“Kami rayat ke seranta sereta semina bepanggai ba tanah nya endur beridup, nyema penanggul tu majak nyadi iya tau munuh kami,” ku iya.
Ketetiga iku pengari peranak tiga bengkah kampung nya madah, kompeni nya patut berandau enggau semua rayat ke kena keruga tanah, baum memanah awakka pemutus bela meri penguntung ngagai kededua piak.
Kami ngelaluka kompeni nya berandau memanah enggau rayat ngambika sama bulih penguntung,”ku tandu sida.