KUCHING: Gerempung Industri Kereban Dalam Rumah Sarawak (SFIA) benung nyendiaka keretas perambu numbuhka ‘The Furniture Village’ dikena ngenegapka agi industri kereban dalam rumah di nengeri tu.
Presiden SFIA, Sim Lee beng madahka keretas perambu nya deka dikenataika ngagai Menteri Pengatur Pemansang Pengeraja Asal enggau Rampa Menua Datuk Amar Awang Tengah Ali Hasan ti mega Menteri Pemansang Industri, ngambika dikemendar.
Nitihku Sim, nengah ‘furniture village’ ila, gerempung ulih ngempuruka pengilang ke bekualiti dibaruh seiti perabung ngambika bekerejasama ngangkatka gamal kereban dalam rumah menua ngagai tikas antarabansa.
“Tukang ngaga kereban dalam rumah nengeri tu besemekih enggau tukang ke enda besai puku baka ari menua China enggau Vietnam.
“Taja pia, nya enda ngeruga industri kereban dalam rumah menua tu ti majak ngerembai.
“Enti perintah ngaku sereta nyukung pengawa kolektif pengeluar kereban dalam rumah menua tu, tentu iya ulih mantu nyungkak agi industri kereban dalam rumah di Sarawak ngagai tikas ke lebih tinggi,” ku iya.
Sim mansutka pekara nya ba pengerami bejadika ‘Sarawak Furniture & Home Expo 2014’ ti diatur SFIA ba Dewan Pameran City One Mall ditu ensana.
Dulu ari nya lebuh bejaku ba pengerami nya sim madahka SFIA udah ngerikut sejarah besai berindik ti mujur ngatur program nya.
Iya madahka kelimpah ari pengilang kereban dalam rumah menua tu ti mantaika produk Sarawak, pengawa pemandang nya mega bisi dipasuk pesereta ari Semenanjung Malaysia.
Gerempung mega ngembuan juluk deka ngatur pengerami nya ngagai renggat antarabansa sereta narit raban orang ke beranak ke puku ari menua luar, ku iya.
“Nengah ekspo tu kami ngarapka tu nyadi pelasar kami ngerembaika penyedar ngagai orang mayuh, ngerapitka penyerakup industri menua tu enggau ngerembaika ngagai makit luar,” ku Sim.
Pengawa pemandang tauka ekspo nya berengkah diatur 29 Ogos ngagai 1 September tu, lalu dibuka ngagai orang mayuh ari pukul 10 pagi nyentuk 10 malam.
Pesereta pemandang tu mega nyengkaum ari konterikor pemaju tanah, penengkebang pelin perengka dalam, ejen insuran, penyadung enggau penyual kereban elekterik, kompeni ngias rumah enggau pengeluar kereban dalam rumah.
Mensia mayuh ditesau sampal datai ngulu ekspo tu laban mayuh peluang endur bulih perais nengah pengawa enchabut tiket benasit.