SIBU: Kaban Kunsil Nengeri (ADUN) Daro Murni Suhaili nyakal penemu ke ngumbai rayat di Sungai Lengan nadai ngembuan pemansang sereta enda dikeibuhka perintah sentang pemansang ke bisi di menua nya.
Murni madahka diri enda setuju enggau penemu sereta enda pechayaka jaku ke dipansutka David Majang Sang, ke ngarika rayat di Sungai Lengan ngumbai sida di menua nya nadai nerima pemansang.
Iya madah, Majang semina nempa cherita ke nadai pugu sereta bula.
“Utai ke disebut Majang nya sigi bula laban ke ditemu aku udah mayuh pemansang diberi ngagai rayat di Sungai Lengan. Perintah enda kala bula ke danji sereta chukup beratka rayat.
“Ambi ke chunto, jalai alun bisi udah digaga dikena ngelantangka rayat di menua nya.
“Kelimpah ari nya, sekeda pemansang bukai baka karan enggau perengka penyambung mega udah bisi diberi ngagai rayat di Sungai Lengan dikena sida ngemujurka pengidup diri.
“Sungai Lengan mega deka nerima bekal ai beresi enti sema projek nyambung paip ke digaga ari Sibu nyentuk ngagai Tanjung Manis udah tembu,” ku iya.
Iya mega nyakal penemu Majang ke ngumbai pemansang enggau sekeda subsidi ke bisi diberi ngagai rayat di Sungai Lengan udah ditarit lalu nadai agi dikemendar.
Majang mega bedawaka sida di Sungai Lengan enda kala ngasaika pemansang baka jalai alun, ai beresi enggau kuasa karan sereta madahka rayat di menua nya enda dikeibuhka perintah taja pan suah udah minta pemansang dikena ngangkatka tikas pengidup sida.
Perintah mega didawa enda kala ngibuhka pemansang di sekeda sekula ke bisi di menua nya kelebih agi SK Sungai Lengan, ku iya.
Majang nampung jaku iya madahka sida di menua Sungai Lengan ukai semina deka nukar endur sida ngundi maya pengawa bepilih ila, tang mega madahka sida deka mindah ngentak rumah di Bawang Assan sereta ulih ngasaika pemansang begulai enggau peranak menua nya.
Majang mantaika sebana iya dikena ngayanka pengeringat diri lalu ukai ngarika semua rayat di Sungai Lengan.
“Kitai bisi Chairman ari raban PBB, Dee Tam ke ulih nulung mutarka penanggul tu sereta bejaku ngarika rayat di Sungai Lengan,” ku iya.