Ngelama tu iya seiku indu Iban ke chukup chakah ngemujurka pengawa NGO enggau mantu ngemansangka raban indu Dayak
SIBU: Chairman Sarakup Indu Dayak Sarawak (SIDS) Sibu Ir. Alice Jawan Empaling nyadi indu keterubah ari pelilih menua Batang Rajang nerima midul Panglima Setia Bintang Sarawak (PSBS) ke ngujungka iya bulih gelar ‘Dato’ ari Darjah Pemesai Nengeri beserimbai enggau pengerami ngintu Hari Pengada Tuai Pemegai Menua (TYT) Nengeri Sarawak Tun Pehin Sri Abdul Taib Mahmud Ke-78, kemari.
Alice nyadi indu bansa Iban keterubah di nengeri tu ke ukai megai pengawa dalam bidang politik nerima anugerah PSBS.
Iya mantaika pengaga ati sereta meri besai terima kasih ngagai perintah nengeri ketegal ti udah milih iya nerima gelar ke chukup berega sereta nyadi seiti tanda basa ke chukup besai ngagai raban Dayak kelebih agi ngagai indu bansa Iban ke diau di pelilih menua Batang Rajang.
“Anugerah PSBS tu seiti ari tanda basa ke chukup berega kelebih agi ngagai raban indu Iban di menua Sibu. Aku mega deka bekunsi pengaga ati ba anugerah ke diterima aku enggau semua bansa di nengeri tu kelebih agi raban indu bansa Iban ke diau di menua Sibu.
“Tu ngelai perintah meri basa ngagai kitai raban bansa Dayak berindik ari pengeransing kitai dalam ngemansangka bansa enggau nengeri tu,” ku iya.
Iya mega madahka diri bekunsi pengaga ati iya berima anugerah nya enggau raban Kristian Methodist ke mayuh udah nulung ngemansangka raban indu Methodist di menua tu.
Ir. Alice, 50, peranak menua Sungai Assan, Sibu bisi ngembuan seiku anak indu.
Kelimpah ari mangku pengawa nyadi Chairman SIDS Sibu sereta Komiti Eksekutif SIDS, iya mega megai pengawa nyadi Presiden Aum Besai Indu Methodist (GCMW) Malaysia.
Iya mega mangku pengawa nyadi Sapit Menija Besai Lembaga Ai Sibu sereta ngembuan pengelandik dalam bidang ai antarabansa sereta kala nyadi pengelicha ba aum bekaul enggau ai antarabansa di menua luar.
Alice ngembuan setipikit dalam bidang ‘Bachelor Of Science (Civil Engineering) ari University Of Tennessee-Knoxville, USA sereta ‘Executive Master Of Business Administration-Ohio University, Ohio, USA.
Berindik ari nya, iya ngenataika pengaga ati meri besai terima kasih ngagai perintah nengeri ke udah nyiri iya nerima gelar PSBS.
Kelimpah ari nya, Ir. Alice seiku indu ke chukup chakah ngemujurka pengawa NGO kelimpah mayuh mantu ngemansangka raban indu Dayak di menua tu kelebih agi raban indu gerempung GCMW.