SRI AMAN: Seiku ari Penghulu ti megai peranak ba kandang menua Pakit madahka ripot ti nerangka kandang tanah Opis Penyerakup enggau Pengintu Tanah Sarawak (SALCRA) di Pakit nya diempu Francis Xevier Dagang, Christopher Jalai enggau Gerajie Junau, enda amat.
Ku iya, penerang sida tiga nya lebuh ti ngeriput ngagai Chairman DAP Pampang Sri Aman Leon Jimmy Donald ti madahka iya (Penghulu) salah nguna kuasa mega pekara ti enda betul.
Ke bendar sida tiga nya suah ngachau runding peranak rumah panjai ba kandang menua Pakit sereta mantah pemansang ke dipejalaika (ba kandang menua Pakit), ku Pengulu nya.
“Sida tiga tu suah ngachau runding rayat di rumah panjai kelimpah ari mantah ke deka dipejalaika Barisan Nasional (BN) ngelama tu,” pia ku iya madah ngagai Utusan Borneo ditu, kemari.
Apin lama ke udah, orang ke ngempu tanah Francis Xavier Dahang, Christopher Jalai enggau Gerajie Jenau ngeriput ngagai Leon madahka tanah 16.5 hektar ba kandang menua Pakit dipulau SALCRA endur nanam sawit ungkup kedua kali udah dikeruga orang.
Leon madahka asil pansik ti dipejalaika, tanah ke mesai 16.5 hektar enda ulih dikemansang ketegal ulah Pengulu kandang endur nya.
Nitihku Pengulu nya, ke bendar tanah ti dipulauka nya deka endur nanam baru ti kedua kali laban tanah nya tanah gunasama ke ukai diempu sesapa, taja pan dalam kandang pemansang SALCRA.
Pekara nya asil pemutus SALCRA ke setuju enggau 73 pintu ruang bilik tauka 90 peratus peranak ari dua buah rumah panjai ke deka nirika rumah panjai baru ba endur nya.
Ba pekara nirika rumah panjai ba endur ke baru nya endang ari baruh kuasa dua iku tuai rumah panjai nitihka Adat Isitiadat Iban 1993, ukai ari kuasa tauka Penghulu, ku iya.
“Ba pekara deka nirika rumah panjai ba palan baru nya endang ari baruh kuasa Tuai Rumah, ukai kuasa aku,” ku iya seraya madahka diri enda lantang ati enggau tuduh nya, laban orang nya enda nemu nama pekara ke amat.