KAPIT: Sapit Menteri Pemansang Menua Pesisir enggau Kandang Menua Malaysia, Datuk Alexander Nanta Linggi udah nyuaka duit bantu pengawa rama perintah ngagai Gerempung Tai San Ten dikena sida bejalaika pengawa rama nyengkaum meri duit bantu ngagai sida ke mujur dalam pelajar enggau sida ke ditinggang penusah.
Bantu nya diterima Tukang Wang Gerempung Tai San Ten, Sng Geok Yien ke diatur ba sebengkah hotel ditu sereta diperatika Chairman Gerempung nya, Kong Chak He enggau raban komiti ke bukai.
Sama bisi datai, Pemancha Yong Thu Fook, Pemesai Khas P 215 Parlimen Kapit, Shia Shui Poh, Chairman Serakup Dayak Iban Sarawak (SADIA), Edward Manggah enggau raban bukai.
Ba pengerami nya, Alexander muji pengawa raban gerempung Tai San Ten bekaul enggau pemujur sida ke bejalaika pengawa rama mantu mensia mayuh.
Iya mega muji mayuh raban gerempung ukai perintah (NGO) di menua Kapit chukup siru sereta mentas nulung sida ke seranta pendiau.
Pengawa baka tu chukup manah sereta patut dipajakka belama sampai jemah ila.
Alexander mansut ka pengaga ati iya lalu meri besai terima kasih ngagai gerempung Tai San Ten ke mega gerempung ari raban bansa China ke chukup ransing bejalaika pengawa sida.
“Kebendar iya, gerempung Tai San Ten tu seiti ari gerempung ke chukup chakah. Sida ukai semina nulung bansa China tang mega nulung bansa bukai nyengkaum bansa Dayak di menua Kapit.
Berindik ari pemanah runding raban gerempung Tai San Ten, Menteri Besai Malaysia Datuk Seri Najib Razak meri bantu agih belanja RM1 juta ringgit ngagai gerempung nya dikena sida ngaga pendam,” ku iya.
“Seiti pemanah raban gerempung Tai San Ten iya nya sida ukai semina meri bantu ngagai kaban ari gerempung sida aja, tang deka meri bantu ngagai semua peranak di menua Kapit.
“Nya alai, malam tu aku meri geran agih belanja penyampau RM10,000 ngagai gerempung Tai San Ten laban aku nemu duit ke diberi tu deka diguna nengah chara ke betul nyengkaum mantu sida ke seranta pendiau sereta dikena mantu sida ke mujur dalam pelajar.
Pengawa baka tu chukup manah dipeda aku,” ku Alexander nampung jaku iya.