KUCHING: Kira 11,000 hektar Tanah Adat Bansa Bumiputera (NCR) ke ditanam enggau kelapa sawit di Song diadang ulih nyadi pun penatai pemisi ke chukup beguna dikena ngemansangka ekonomi sereta ulih meri pemansang ngagai 32 buah rumah panjai ke bisi di menua nya, ku Sekretari Politik Kepala Menteri Tengku Gruna.
Iya madahka Komiti Penyerakup enggau Pengintu Tanah Sarawak (SALCRA) udah tetemuka palan ke chukup manah dikemansangka di menua nya.
“Kitai sama ngarapka 56,000 hektar tanah NCR di menua Kapit tu ulih dikemansang awakka ulih nyadi pun penatai pemisi ke chukup beguna sereta nyungkak pemansang ekonomi rayat,” ku iya.
Iya mega bisi nyebut Sapit Kepala Menteri ke mega nyadi Chairman SALCRA Datuk Patinggi Tan Sri Alfred Jabu madahka ba bulan Julai tu tadi menua Song dikelala nyadi seiti ari palan baru ke deka dikemansangka SALCRA
“Laban ke udah kala gawa ba bank, aku andal bendar menua pesisir di nengeri tu ulih mansang enti sida nerima perambu enggau atur perintah ke deka ngemansangka sekeda alai endur kelebih agi ngagai rayat di menua Song,” ku Gruna nampung jaku iya.
Lebih 32 iku Tuai Rumah Panjai di pelilih menua Song udah setujuka tanah sida dikemansangka SALCRA.
Nambah ka nya, mayuh sekeda ari sida ngasuh aku madah ngagai perintah minta perintah bejalaika pengawa ngemansangka menua tu enggau lengkas awakka sida ulih lengkas nerima pemansang,” ku Gruna.
SALCRA deka ngatur aum ba sekeda rumah panjai di Song bekaul enggau perambu pemansang nya urung bulan Disember tu ila tauka tumu agi ari nya.
“Pengudah aum nya ila, SALCRA deka betemu enggau peranak rumah panjai di menua nya dikena nerangka enggau silik bekaul pemansang ke deka diberi ngagai sida,” ku iya.
Gruna madahka tuju perintah meri pemansang ngagai rayat di nengeri tu dikena ngangkatka pemanah tikas pengidup rayat ke diau di menua pesisir sereta ulih meri pengelantang ngagai sida dalam timpuh ke chukup lama.
Gruna meri besai terima kasih tanda pengaga ati iya ngagai perintah kelebih agi ngagai Sapit Menteri Pemansang Menua Pesisir enggau Kandang Menua Datuk Alexander Nanta Linggi ke mayuh udah nulung ngemansangka pelilih menua Song.