KUCHING: Program beperesa pengerai tubuh enda bebayar ke disedia Opis Pengelikun Rama (Perkeso) enda nerima timbal ke manah ari raban pencharum.
Menteri Sumber Mensia Datuk Seri Richard Riot Jaem madah, naka kediatu enda datai 20 peratus orang ke diberi baucher udah nguna baucher nya dikena sida meresa pengerai diri.
“Tuju program dikena nentuka orang gawa seruran regas sereta produktif lalu nadai kebuah ke nyemetak baka ni program tu enda nerima timbal ke manah.
“Kitai melabaka sida rawan beperesa, nangika diri ditemu ngidap penyakit kronik,” ku iya.
Iya mansutka jaku nya ba pengerami Nyuaka Dua Mesin Hemodialisis Perkeso ngagai Palan Hemodialisis Gerempung Tungkul Sengayuh Sarawak (KAS)-ROTARY-Yayasan Tungkul Sengayuh Nasional (NKF) pampang Kuching di Jalai Tun Ahmad Zaidi Adruce ditu, kemari.
Iya nambah, Perkeso ngemeratka pengerai pencharum lalu pengawa nyendiaka perengka dialisis ungkup orang ti napi penyakit tungkul sengayuh mandangka pemesai reti ba tuju pengawa nya.
Ngenang kaul bukai, Riot madahka Perkeso udah mayar semua penumpang enggau staf bilun ti bebadi ba penusah bilun Malaysia Airlines MH17.
“Semua staf bilun enggau lima iku penumpang ke diperabung Perkeso udah dibayar nitihka patut. Belanja ngubur enggau bayar pinchin keterubah ba penyampau RM2,655 sebulan udah dibayar ngagai peturun mansa,” ku Riot.
Iya nambah ungkup sida ke enda diperabung Perkeso, sida nadai hak nerima bayar nya.
“Enda ngira ni pengelama sida udah mayar tauka diperabung Perkeso, sida sigi deka nerima bayar penuh baka kes Meling Mula ari Bintulu.
“Niang Meling berengkah mayar Perkeso enam bulan tu ke udah pengudah iya gawa ba kompeni baru tang bini iya deka nerima bayar nitihka patut,” ku Riot.