BARU SANGKAI: Moggie (kanan) disempulang Awang Hambali tama ngagai Dewan Brooke ngulu pengerami Makai Lemai Alumni IPG Batu Lintang malam ensanus.
KUCHING: Palan Pematih Pengajar (IPG) Batu Lintang, Kuching meri penguntung ngagai pengawa pelajar di Sarawak, pia ku Chairman Tenaga Nasional Berhad (TNB) Tan Sri Dr Leo Moggie.
Moggie ke kala belatih ba IPG Batu Lintang tauka dikelala nengah nama kolej pematih dalam taun 1953, madah beribu iku pengajar udah mujur ditempa ari endur nya sereta diatu benung ngajar ba sekula di serata nengeri tu.
“Kolej Batu Lintang ngembuan sejarah kediri empu lalu deka seruran dikeingat semua peranak Sarawak.
“Ditu meh alai semua peranak nengeri Sarawak nyentukka Brunei enggau Sabah digempuru sereta diberi peluang belajar, ke disedia kolonial pengudah perang.
“Semua sekula di nengeri tu teulihka pemaik ari pengawa manah ke udah dikereja IPG Batu Lintang ke nyadi palan pematih pengajar ti keterubah endar ditumbuhka di Sarawak,” ku iya.
Iya mansutka jaku tu ba pengerami makai Lemai Alumni IPG Batu Lintang ke diatur di Dewan Brooke ditu malam ensanus, nyerumba pengawa ngintu 66 taun penumbuh IPG nya.
Ngenang senentang IPG Batu Lintang kelia, Moggie madah keterubah endar palan nya kelia nyadi palan soldadu British (kolonial) sebedau diganti Jepun lalu nyadi palan endur ngurung orang perang dalam taun 1945.
Ku iya, pengudah perang, perintah maya nya (kolonial) lalu numbuhka sekula ke nyadi palan pematih pengajar ti keterubah di Sarawak.
“Ba Batu Lintang maya nya, raban pengajar endang talukka pengawa meri pelajar ngagai nembiak lalu pia mega enggau raban pemesai kolonial,” tandu Moggie.
Ba pengerami nya, Moggie mega bisi ngelanchar Tabung LED Board Batu Lintang, ke alai iya ngarika TNB deka ngagihka sekeda bantu.
Tabung LED Board dikena ngiga belanja kena ngaga papan penerang ti deka diengkah ba simpang penama ngagai palan nya di Jalai Batu Lintang.
Bela bisi datai ADUN Saribas Mohd Razi Sitam, Direktor IPG Batu Lintang Awang Hambali Awang Hamdan enggau raban Alumni.