Pesakit tungkul sengayuh majak nambah: Riot

0

Dikarang Chris Bishop

 

DIKENA BERUBAT: Riot bejadi pengawa Nyuaka Dua Mesin Hemodialisis Perkeso ngagai Palan Hemodialisis Gerempung Buah Pinggang S’wak (KAS)-ROTARY-Yayasan Buah Pinggang Kebangsaan (NKF) pampang Kuching di Jalai Tun Ahmad Zaidi Adruce ditu, kemari.

Naka bulan Ogos penyampau pencharum Perkeso ke benung diperubat di Sarawak manggai 438 iku

KUCHING: Nitihka statistik ari Opis Pengelikun Rama (Perkeso), penyampau orang ke diperabung insuran tauka pencharum ke ngidap penyakit tungkul sengayuh nambah ari 17 ngagai 20 peratus ninting taun.

Menteri Sumber Mensia Datuk Seri Richard Riot Jaem madah nyentuk ngagai bulan Ogos tu tadi, penyampau pencharum ke benung diperubat nengah chara dialisis ba 13 palan hemodialisis di Sarawak manggai 438 iku.

Ku iya, peratus ke majak nambah nya chukup ngirau ati ketegal pekara nya ukai semina mungkur pencharum tang meri pangka ba penatai pemisi tiap ruang bilik.

“Opis menteri nengah Perkeso ngasaika penyampau ti nambah ari 17 ngagai 20 peratus tu ukai pekara ti manah lalu balat meri pengirau.

“Nyentuk bulan Ogos tu tadi, Perkeso udah ngemendar 10,004 iti pinta perengka dialisis ari orang nerima pinchin ilat enggau ukai ilat ke alai naka ke diatu bisi 449 palan berubat dialisis ke dipilih Perkeso di serata menua,” ku iya.

Iya mansutka jaku nya ba pengerami Nyuaka Dua Mesin Hemodialisis Perkeso ngagai Palan Hemodialisis Gerempung Tungkul Sengayuh Sarawak (KAS)-ROTARY-Yayasan Tungkul Sengayuh Nasional (NKF) pampang Kuching di Jalai Tun Ahmad Zaidi Adruce ditu, kemari.

Riot ti mega nyadi Kaban Parlimen Serian nambah pekara nya tau mega ngujungka perintah lenyau modal mensia ke berega kelebih agi ba pengawa ngangkatka produktiviti menua.

Kelimpah ari nya, Riot madah ungkus belanja dikena nyendia semua perengka berubat sakit tungkul sengayuh mega deka nambah.

“Ba taun 2013, Perkeso melanja RM122.8 juta dikena nyendia perengka dialisis ungkup pencharum lalu penyampau tu nambah 17 peratus enti dibandingka belanja ba taun 2012 ti manggai 104.6 juta,” ku iya.

Dalam timpuh bulan Januari nyentuk Ogos taun tu, Perkeso udah melanja RM81.13 juta dikena mantu ungkus berubat dialisis ke alai penyampau nya disadang nambah nyentuk pengujung taun tu, tandu iya.

Ba kaul ke sama, iya madah 448 mesin hemodialisis ke beungkus RM17.24 juta udah diserah ngagai palan dialisis ke dipilih Perkeso ke nyengkaum diberi ngagai gerempung ke ukai dikuasa perintah (NGO) enggau gerempung bukai ti enda ngiga penguntung di serata menua.

Ari penyampau nya, 37 mesin hemodialisis diagihka ngagai Sarawak,” tandu Riot.

Bela datai Chairman NKF Malaysia Datuk Dr Zaki Morad Mohamad Zaher, CEO Perkeso K.Selvarajah, Direktor Perkeso Sarawak John Riba Marin enggau orang bukai.