Sistem telekomunikasyen ba Rumah Panjai Patrick Libau deka dikemanah

0

 

NIBARKA JAKU TANGKAN: Shabery bibarka jaku tangkan ba pengerami program Titik Sentuhan ke diatur ba rumah panjai Patrick Libau. — Gambar Bernama

MIRI: Perintah deka ngemanahka sistem telekomunikasyen ba Rumah Panjang Patrick Libau ditu kena nyaup nyungkak ekonomi 650 iku peranak rumah panjai nya ke lebih agi dalam sektor dagang temuai.

Menteri Komunikasyen enggau Multimedia Datuk Seri Ahmad Shabery Cheek madah, pekara ti deka dikemerat iya nya nentuka peranak rumah panjai nya ulih ngena servis Internet nengah teknoloji satelit ujung taun tu.

“Aku meri timpuh tiga bulan ngagai Kaunsil Komunikasyen enggau Multimedia (SKMM) ngaduka nya,” pia ku iya lebuh bejadika program Titik Sentuhan ke diatur Opis Penerang ditu apin lama ke udah.

Ku iya, SKMM mega udah dipinta ngiga chara dikena ngemanahka kualiti bungkur telefon binching ba kandang rumah panjai nya laban kualiti servis ti enda ngemuaska ati dia.

“Aku empu udah meresa telefon binching aku sereta nemu bungkur servis ari ketetiga kompeni telekomunikasyen baka Celcom, Maxis enggau Digi enda ngemuaska ati,” ku iya.

Ku Ahmad Shabery, penanggul telekomunikasyen di Rumah Panjai Patrick Libau deka diputar enggau lengkas laban penyampau temuai ke majak mayuh enggau ba program nyemilik, ke alai rumah panjai nya enda jauh ari Taman Negara Gua Niah sereta deka dichalun nyadi Palan Pesaka Sedunya Unesco.

“Sida (temuai) begunaka Internet enggau telefon ke tuju pelajar sereta ngelakuka dagang temuai. Aku minta Tuai Rumah Patrick Libau Ak lgnatius Sulla nganjung pesan pandak (SMS) enti sema penanggul nya lalu enda ulih diputarka,” ku iya.

Beserimbai enggau pengerami nya, iya meri belanja RM10,000 ngagai rumah panjai nya dikena mantu melanja mayuh bengkah program ke diatur ba rumah panjai 32 pintu ti dalam kandang ladang sawit nya.

Dulu ari nya lebuh ke bejaku, Libau madah dalam timpuh Januari nyentuk ke Ogos taun tu, bisi 10,000 iku temuai ari dalam enggau menua tasik udah masuk ba program nyemilik rumah panjai nya.

Bela bisi dia maya nya,Kepala Sekreteri Opis Menteri Komunikasyen enggau Multimedia, Datuk Seri Abdul Rahim Mohamad Radzi, Ketuai Direktor Penabur, Datuk Norhayati Ismail, Ketuai Direktor Jasa, Datuk Fuad Tan Sri Hassan enggau Sapit Ketuai Pengarang Bernama, Datuk Zakaria Abdul Wahab. — Bernama