Dikarang Chris Bishop //
PEMATAK JALAI: Raban Koir St Philip Chapel Bt 12 begambar begulai enggau Bishop Bolly (duduk kiba).
KUCHING: Seraban 63 iku peranak ari empat buah palan pengerembai pengarap keristin besendi di genturung pendiau ditu udah dikemujur ba pengawa pengentap nengah “The Sacrament of Comfirmation’ ke diatur di St Philip Chapel Bt 12 kenaka Hari Enam tu tadi.
Atur ke nyadi sebengkah pengawa besai dalam pengarap Keristin nya dikemujurka The Most Reverend Archbishop (The Province of South East Asia) Datuk Bolly Lapok.
Ba pengawa nya kemari, Bolly ngemujur pengawa pengentap 6 iku orang keristin ari Anglican Worship Centre (AWC) Bt 13, 22 iku ari St David Bumbok, 9 iku ari St Philip Chapel enggau 26 iku ari AWC Landeh.
Ba jaku lalau rambau pengawa nya, Bolly madah, pengawa sida ti dibasu pala dulu agi ari tu diatur enggau tuju ngambika sida beresi, tuchi lalu diadaka baru nyadi anak Allah Taala.
“Awakka serega nyadi ruang bilik kita, awakka Allah Taala ke digiga aki ini kita kelia diatu nyadi ke apai kita.
“Ukai mimpi nya, ukai utai ke digiga agi. Nya dipadah ke iya (Allah Taala), aku empu datai awakka kitai ulih selamat, awakka jaku diadaka nyadi mensia.
“Nya alai dalam pengarap Keristin, nya ke dianti sekayu rumah datai, timpuh ke dianti sekayu mensia datai lalu patut dikerami.
“Enti aki ini kitai kelia sampai begawai gagaka mimpi manah, enda tau enda kitai rami, andal ketegal utai ke digiga aki ini kitai kelia udah nyadi dalam pengidup kitai, ‘ku Bolly.
Tu meh mimpi, burung enggau pemeri ke pemadu manah, tandu iya.
Pengawa pengentap ke diatur ensanus nyadi pengawa kedua kali udah dipejalaika di St Philip Chapel.
Keterubah pengawa nya diatur ba taun 2010 lalu dikemujur Pemantu Bishop Rt Rev Aeries Sumping Jingan.