SRI AMAN: Kaban Kunsil Nengeri (ADUN) Lingga, Simoi Peri ngelalau tiap Komiti Pemansang enggau Pengelikun Genturung Pendiau (JKKK) di nengeri tu ngena geran ke diberi pengari rayat ngemansangka genturung pendiau enggau rumah panjai sida lalu ukai ke dikena nguntungka diri.
Ku iya, geran ke diberi pengari rayat diungkup ke pengawa pemansang sereta bejalaika mayuh bengkah program di rumah panjai tauka genturung pendiau, lalu ukai ungkup JKKK nya.
“Kami ke nyadi pengari rayat enggai meda bisi bala JKKK bebagika geran ke diungkup ngagai tabung JKKK nya dikena sida empu aja, laban geran nya patut dikena ngemansangka rumah panjai tauka genturung pendiau sereta bejalaika pengawa JKKK,” ku iya.
Iya bejaku munyi tu lebuh ke berandau enggau pengarang berita pengudah ‘Program Turun Padang Jenguk Rakyat ‘ di Genturung Pendiau Putat ditu pagi kemari.
Dalam pekara tu, Chairman JKKK ba tiap buah rumah panjai tauka genturung pendiau patut beratika tiap bengkah pekara tu, laban chairman JKKK patut nemu tuju dikena melanja duit nya ke JKKK sida.
“ Enti sema geran nya dipedua ngagai ninting pintu dalam sesebuah rumah panjai tauka genturung pendiau ngambika bisi dikena meli keresa rumah sereta tabung sekula bala anak,nya nadai ngawa tang enti sema duit nya dikena sengapa tauka nadai tuju, nya salah.
“Ke bendar duit nya patut dikena meli keresa rumah tauka belanja bala anak ke sekula enggau sekeda pekara bukai, ukai dipedua enggau tuju ke enda menuku sereta nadai meri penguntung ngagai sesebuah ruang bilik tauka JKKK,” pia ku iya.
Chairman JKKK nya empu patut berunding enggau bala kaban JKKK iya, kati chara melanja geran ti diberi pengari rayat nya ke tuju pemansang JKKK sida.
Bela bisi ngulu program nya, Pemesai Opis Hal Ehwal Khas (JASA) Sarawak, DUN Lingga, Sulaiman Amut.