MIRI: Seiku ke ngempu seruyuk ba Penyangkai Bilun Lama Lutong endur iya bedaja dirubuh raban penerit adat Opis Kandang Bandar Miri (MCC) ujung bulan Ogos tu tadi, minta atur ke sebaka dipejalaika ba raban orang ke bedaja enggau nadai pemendar di Kuala Baram enggau Tudan sereta enda bechiping lebuh bejalaika pengawa.
Abu Hurairah Mohamad madah MCC baka ke nutup mata sepiak bejalaika atur lalu enda nagang raban orang ke bedaja enggau nadai pemendar di Zon Industri Kuala Baram sereta besemak enggau Masjid Permyjaya di Tudan taja pan bisi ripot udah dikenatai ngagai opis nya.
“Nyentuk sehari tu, nadai atur udah dipejalaika MCC kena nagang pengawa nya taja pan bisi dipeda peranak ari menua Indonesia bedaja di Zon Industri Kuala Baram,” ku Abu.
Ku Abu, iya udah madahka pekara nya ngagai raban media.
Tang nyentuk ke seharitu lalu nadai dipeda sebarang atur nagang pengawa nya dipejalaika.
Iya mega madah, ukai semina peranak Indonesia bisi dipeda bedaja ba endur nya, tang ari menua Bangladesh mega bisi dipeda bedajaka cabi, bawang enggau macham bengkah sayur babas bukai ba nya ninting Hari Minggu.
Tang lalu nadai sebarang atur enggau ukum dilempaika raban MCC.
Kelimpah ari nya, Abu madah, sekeda raban orang bedaja nengah chara nadai pemendar di Tudan mega enda diukum sereta seruyuk ke endur sida bedaja enda ditegu tauka dirubuh.
“Nama kebuah seruyuk kami ke bedaja ba Penyangkai Bilun Lama Lutong tu aja direrak sereta ditagang ari terus bejalaika pengawa daja kami taja pan kitai sama bela nemu palan tu sebengkah ari tempat endur mensia mayuh ngelantangka ati,” ku iya.
Iya minta buah runding Menteri Muda Pengawa Lumba ke mega Kaban Kaunsil Nengeri (ADUN) Senadin Datuk Lee Kim Shin mutarka penanggul ke nuntung sida.
Abu nampung jaku iya madah, raban orang bedaja ba endur nya semina ngulihka belanja ke mimit asil ari pengawa bedajaka kuih, nyual ikan enggau sekeda buah.
Enggau pemutus jaku, Abu madah, sida tetap nerima enggau ati ti lantang enti sema diberi permit sentara endur bejalaika pengawa daja sida.
Tang enti nasit sida enda dikeibuh, sida ke tebal pengundi ba sitak Senadin enggau Piasau deka bekimpin enggai ngundi maya pengawa bepilih besai dudi tu ila.