KANOWIT: Raban bansa Iban di pelilih menua Kapit patut bechuntoka raban bansa China kena nyapai pemujur dalam pengidup.
Menteri Muda Pemansang Tanah Datuk Gramong Juna mansutka jaku nya madah, raban bansa China seruran ngiga awak kena ngemansangka diri dalam semua pengawa.
“Sebengkah ari pengelemi raban bansa Iban iya nya, kelalu bepegai ba leka jaku ‘peda, nganti dulu mih’ tauka duduk bekerendut dada sereta enggai ngerandang peluang dikena ngemansangka diri.
Ulah ke baka tu ngujungka bansa Iban jauh tinggal pemansang enti dibandingka enggau bansa China enggau India.
“Kitai patut nemu sereta beratika jaku sempama, ‘pemansang enggau awak ke dikembuan sereta umur enda kala nganti kitai’.
Kitai patut ngubah runding enggau pikir sereta badu ngelusu tauka lembau ke nadai meri penguntung,” ku iya.
Iya ngelalau raban bansa Iban di menua nya lebuh bejadika pengawa nasih tanah projek pemansang tanah (NCR) di Nanga Tada Hari Enam tu tadi.
Gramong ke mega Kaban Kaunsil Nengeri (ADUN) Machan madah, maya iya sekula suba, mayuh raban bansa Iban takut nganjung anak sida besekula taja pan perintah bisi sekula perintah maya nya.
“Sida semina madah ‘anti, peda dulu’.
Tang ni pengelama kitai bansa Iban deka nganti enggau meda aja? “Kitai patut ngambi sereta nangkup semua peluang ke diberi,” ku iya.
Nangkanka nya, iya mega ngelalau sekeda peranak menua ke agi takut nerima sereta nyeretai sekeda projek ke enda ngachau awak enggau pengawa sida.
“Tanah kitai sebengkah ari aset ke chukup beguna sereta ulih ngenataika penguntung enti dikemansangka,” ku iya.
Projek nya dipejalaika lima bengkah kompeni ke ngambi bagi nyengkaum Victory Round Sdn Bhd, anak kompeni Subur Tiasa, Land Custody and Development Authority (LCDA) sereta raban pengempu tanah NCR 169.
Nitihka penemu Menijar Subur Tiasa Philip Teng, ungkus dikena bejalaika projek nya begunaka ungkus belanja RM130 juta ke mungkur 12,037 hektar tanah ke deka ditanamka sawit.
Sama bisi datai, Kaban Kunsil Nengeri (ADUN) Ngemah Alexander Vincent, DO Pelilih Menua Kanowit Katis Noel Nyabong, Menijar LCDA Agro Division Razali Zainuddin, Chairman Komiti Pemansang Nanga Tada Tuai Rumah Mathews Chuat Seribu, Penghulu Ugap Seribu, Penghulu Juni Massam sereta Penghulu Juin Adam.