Ulah kompeni ti nadai belisin nya udah diripot lalu sida mega minta piak ti bekuasa neritka atur
KUCHING: Peranak Genturung Pendiau (GP) Semadang di Jalai Puncak Borneo ditu, diuluka seiku ketuai Samson Mangang kemari ngaga gempuru bebala mayuh mantah kandang menua sida direnchah luri ke diempu sebengkah kompeni batang.
Samson madah kompeni batang nya beambi ulih ari jalai ke benung digaga nyambung Semadang nuju Kampung Danu endur sida tama ngagai kem batang.
Ripot polis udah digaga Hari Enam tu tadi lalu Samson ngarap ejensi ke megai kuasa ulih neritaka atur ba kompeni nya ti bejalaika pengawa batang enggau nadai belisin.
“Peranak Semadang setuju tanah sida dikena endur ngaga jalai penyambung taun tu. Tang kompeni batang nya beambi ulih ari pengawa nya lalu udah nganjung dua iti mesin besai dikena ngereja batang Hari Lima tu tadi ke alai kitai udah ngaga ripot polis ari seiti udah nya,” ku iya madah ngagai pemberita kemari.
Samson madah iya udah betanya ngagai Opis Kereja Raya (JKR) ti megai tanggungpengawa ngaga jalai sepemanjai 2 KM nya lalu sida ngesah nadai nganjung dua buah mesin besai.
Iya mega ngarap JKR enggau ejensi ke megai kuasa nagang sebarang pengawa mai mesin besai tama jemah ila.
“Kitai deka nganjung surat bantah ngagai JKR Sarawak. Jalai baru seigi ungkup pengelantang rayat lalu ukai digaga ungkup kompeni batang.
“Enti ejensi ke megai kuasa enda neritka atur, kami peranak Semadang enda rawan ngaga tekat ba jalai nya ngambika kompeni batang enda tama,” ku iya.
Iya nambah Semadang suba kala mega napi pemar ke sama tang ulih diseliah ketegal nerima bantah ari semua peranak genturung pendiau nya.
“Kitai endang mantah kereja batang ngelingi genturung pendiau ketegal irauka pengelikun enggau pengelantang peranak ditu.
“Pengidup enggau pengerai 680 iku peranak ditu tau dikeruga perengka pengangkut berat kompeni batang enti pekara tu enda ditagang,’ku iya.
Ngenang kaul bukai, iya madah peranak Semadang mega mantah perambu projek sawit ti udah ngerampit ngagai tanah NCR sida.
Iya madah, surat senentang perambu nya disain melekangka iya lalu peranak Semadang enda ditanya dulu senentang projek nya ke diperambu peranak ari Genturung Pendiau Danu.
Ku iya, surat bantah ba perambu projek sawit nya deka dianjung ngagai Opis Tanah enggau Penyukat (LTS) sehari tu (22 September).
“Ari ke ditemu kitai, pengawa sukat ngelingi udah dikereja ba Semadang ke alai adan tanah udah digaga,’ku iya seraya madah MP Mambong Datuk Seri Dr James Dawos Mamit enggau ADUN Bengoh Datuk Dr Jerip Susil udah dipadah senentang pekara nya.